BANNER: Pintor a nakakumpiskaan, carnapped a kotse, nakasuan panagsalungasing anti-fencing law

VIGAN CITY – Umun-uneg ti misterio mainaig iti maysa a kotse a natakaw sadiay San Nicolas, Ilocos Norte idi Abril 22 daytoy a tawen ngem narekobre dagiti polis idi bigat ti Oktubre 21 ditoy Siudad ti Vigan iti ikut ti maysa a pintor a taga-Caoayan, Ilocos Sur.

Apaman a naawatda ti impormasion a nasaripatpatan ti natakaw a kotse, maysa a Vios G iti Quezon Avenue, Barangay 3, Vigan City, partikular iti sanguanan ti United Coconut Planters Bank, Vigan City Branch. nagresponde dagiti nagtitipon nga elemento ti kapolisan ti Vigan City police station, Bantay police station, PIT, Ilocos Sur ken CIDT Ilocos Sur iti panangidaulo ni Senior Inspector Jordan Jesus Lagmay Sambo, provincial officer, PHPT, Ilocos Sur, ket kinumpiskada ti lugan manipud ken ni Warren Quino Serrano, 34, naasawaan, pintor, ken residente iti Barangay Manangat, Caoayan, Ilocos Sur.

Kanaig daytoy, nasaklangan iti kaso a panaglabsing iti anti-fencing law ni Quino

Impetteng ni Quino a binulodna laeng ti kotse manipud ken ni Louie Fobie Piano, 43, naasawaan, ken residente iti Barangay 4, Vigan City.

Ngem kinuna ni Fobie a sinaldaanna iti P100,000.00 ti nasao a lugan manipud iti maysa nga Alvin Tiri.

Maipalagip nga idi Abril 22, 2015, inreport ni Jeffrey Ramos Salvador, 48, naasawaan, negosiante, ken residente iti Barangay 28, Laoag City, a tinakaw ti maysa nga Evangeline Tolentino Pagaoa, 39, naasawaan, ken residente iti Barangay 12, San Isidro, Magat Salamat, Laoag City, ti kotsena a Toyota Vios G, metallic blue, addaan plaka a NOI 839, engine number a nzx922185 ken chassis number ncp938005997.

Ngem iti panagpalutpot ti polis, limtuad nga agpaparenta ni Ramos iti kotse, ket inupaan ni Tolentino ti Vios. Idi saan nga insubli ni Tolentino ti lugan kalpasan ti naituding nga aldaw, inreporten ni Ramos a carnapped.

Manipud ken ni Tolentino, mapapati a naglasat ti kotse iti ikut ti maysa a lalaki sa nagtungpal ken ni Tiri.

Ngem napapatay da Tiri ken maysa a Thaddeus Villalon y Salvador sadiay Sitio Liwliwa, Barangay Caraisan, Magsingal idi malem ti Septiembre 19.
Iti panagimbestiga ti polis, sakbay ti pammaltog, nakita dagiti biktima ken dagiti suspek nga agpapatang iti asideg ti basketball court.

Mapapati a kellaat a pinaltogan dagiti suspek a nakahelmet ken nakaaruat iti nangisit a diaket ken nakalugan iti big bike ni Villalon a nagsagrapanna kadagiti sugat iti ulo ken bagina a puon ti dagus a nakatayanna.

Timmaray ni Tiri ngem kinamat dagiti suspek sada pinaltogan a nagsagrapanna met kadagiti sugat iti ulo ken bagina a nagresulta iti dagus nga ipapatayna.

Nakarekobre dagiti inbestigador iti uppat a buli ken innem a kapsula a nagtaud iti caliber 45 pistol iti nakapasamakan ti krimen.

Mainaig iti droga wenno carnapping ti kitkitaen dagiti inbestigador nga anggulo ti pannakapapatay dagiti dua.

Segun iti kapolisan, nasaklangan ni Tiri iti kaso a carnapping sadiay San Nicolas idinto a panagsalungasing iti R.A. 9165 ken ni Villalon a naipila iti Regional Trial Court Branch 24, Cabugao, Ilocos Sur.

Saan pay nga ammo ti kinasiasino dagiti nangpapatay kada Tiri ken Villalon.

Kabayatanna, nagparangen ti mapapati nga akinkukua iti Vios iti police station ditoy tapno tuntonenna ti luganna.#