BANNER: Polis a nanggudas kaduana a polis, nakabaluden

CANDON CITY – Naipaiman iti Bureau of Jail Management and Penology ditoy siudad ti polis a nanggudas iti dua a padana a polis iti mismo a presintoda sadiay Sigay idi kanikatlo a bulan daytoy a tawen.

Naipaima iti BJMP ditoy siudad ni PO1 Rowel Munar Paragas, akusado a nanggudas iti dua a kaduana a polis iti Sigay Police Station idi Abril 10, 2016  babaen ti commitment order nga inyisio ni Judge Policarpio P. Martinez ti Regional Trial Court, Branch 71, Candon City a naipaturong ken ni Jail Senior Inspector Bruno B. Mariano, OIC BJMP.

Sakbayna, idi agarup 12:10 ti parbangon ti Hunio 15, inaresto dagiti nagtitipon nga elemento ti Sigay Municipal Police Station, kaduada ni Inspector Roger W. Baling-oay, Jr., dati nga OIC ti Sigay MPS ken agdama a deputy COP ti Cabugao Police Station ken ti RIU-1 nga indauluan ni PSI Romeo C. Gachallan ni  Paragas sadiay Baguio General Hospital and Medical Center, Baguio City babaen ti warrant of arrest a pinirmaan ni Judge Gabino B. Balbin, Jr.  gapu kadagiti kasona a murder ken frustrated murder a nai-docket iti babaen ti Criminal Case No. 3751-C ken 3752-C ken CC No. 3753-C  iti RTC Branch 23, Candon City, Ilocos Sur.

Awan ti nairekomenda a piansa ni Paragas para iti umuna a dua a kasona idinto a P200,000.00 ti piansana iti naudi a kaso.

Maipalagip a pinaltogan ni Paragas da NUP Mark Jay Barrientos y Cerna, SPO2 Leborio Dangalen, ken SPO2 Gilbert Rabang bayat ti panangrabii dagitoy iti police station idi Abril 10, 2016.

Naitaray dagiti biktima  iti Candon City Hospital ngem pimmusay da Barrientos ken Dangalen bayat ti pannakataming dagiti sugatda. Nakalasat ni Rabang.

Kas maibatay iti blotter, idi agarup 8:15 ti rabii ti nadakamat a petsa, napan inayaban ni Rabang ni Paragas a mangrabiidan.

Simmurot ti suspek ken ni Rabang a nakaiggem iti isyona a paltog ket idi makaasideg iti lamisaan, kellaat a pinaputokanna dagiti padana a polis a nakasugatan dagitoy malaksid ken ni PO1 Leo Aoay y Prado a nangisuyo iti bagina iti sirok ti lamisaan idi nagpaputok ni Paragas.

Mapapati nga agpaputok koma pay ti suspek ngem  nagbara ti paltogna.

Ginundawayan dayta ni Rabang ket kinagubalna ni Paragas agingga a naagawna ti paltog.

Nagtaray ni Paragas ngem kinamat dagiti padana a polis sada tinengngel ken impisok iti pagbaludan.

Malaksid iti paltog a nabati ti suspek, nakarekobre dagiti inbestigador manipud Crime Laboratory Group ti Ilocos Sur PPO nga indauluan ni PCI Leonardo Q. Arce iti sangapulo ket maysa a naiputok a cartridge cases manipud iti 9MM a pakairamanan ti tallo a buli, 2 a deformed slugs ken 3 a metallic jackets. (Tawid News Team)