BANNER: Ryan agpailayon a gobernador, Chavit para bise gobernador, DV para diputado

VIGAN CITY – Agpailayon ni Gov. Ryan Singson a para gobernador iti probinsia ngem ti ad-adda a nakaituonan ti interes dagiti agpalpaliiw iti politika ti panagipila ni dati a Gov. Luis “Chavit” Singson iti kandidaturana para bise gobernador.

Naggiddan a nagipila ni Singson iti certificate of candidacy-na para gobernador ken ti kandidatura ti amana idi malem ti Oktubre 16, maudi nga aldaw iti panagipila iti certificate of candidacy.

Nagipila met ni Vice Governor Deogracias Victor Savellano iti kandidaturana para diputado a mangibagi iti umuna a distrito iti Ilocos Sur.

Naammuan ti Tawid News Magazine a saan nga agpailayon ni Cong. Ronald Singson ta tumulong iti amana a ni Chavit Singson a mangmanehar iti negosioda.

Maipalagip a daytoy koma ti maikadua a termino ti ub-ubing a Singson kalpasan a napasublina ti puestona nga inibbatanna gapu iti maysa nga insidente a nakainbolbaranna iti HongKong.

Adu ti ngimmato ti kidayna idi mailatak a ni Chavit Singson ti mangsukat ken ni Savellano a bise gobernador gapu iti panagkandidato daytoy kas diputado a mangibagi iti umuna a distrito ti Ilocos Sur.

Iti napalabas, nagbalin a burburtia ti panangipasdek ni Singson ti residensiana iti Narvacan.

Adda dagiti di nakumpirma a damag a panggep ni Singson ti agkandidato a para konsehal iti Narvacan.

Ngem iti pannakairamanna a katiket ti anakna a ni Ryan, kinuna ti maysa nga agpalpaliiw iti politika a maysa a ploy daytoy tapno agpangadua ti kasupangetda iti politika nga agkandidato para iti dua a kangatuan a puesto iti probinsia ta kabanggada ti political kingpin iti Ilocos Sur.

Ngem adda latta nagipila iti kandidaturana para gobernador ken bise gobernador.

Nupay kasta, masuspetsa a masuktanto dagitoy babaen iti substitution inton Disiembre 10.

Kasungani iti ninamnama dagiti supportersna, impila ni dati a Bokal Efren Rafanan ti kandidaturana para bokal iti umuna a distrito ti Ilocos Sur.

Saan metten nga agpailayon iti puestona ni Bokal Christian Purisima ta impilana ti kandidaturana para congressman iti umuna a distrito.

Iti maikadua a distrito, agpailayon ni Cong. Eric Singson iti puestona. Ni manen Henry Capela ti mangsango kenkuana.

Kabayatanna, dagiti sumaganad ti nagipila iti kandidaturada para bokal:

Umuna a distrito: Jeremias Singson, Christopher Baterina, Constante Oandasan, Micaela Singson Mendoza, Benedicto Savellano, Ronnie Rapanut (Ind.), William Pacpaco.

Maikadua a distrito: Pablito Sanidad, Jr., Jaime Singson, Joselle Geronilla, Mildred Elaydo, Gina Cordero, Teresito C. Valera (Ind.).#