BANNER: Sakada Shrine iti Port Salomague, nabendisionan

CABUGAO, Ilocos Sur – Nabendisionan ti maysa a monumento kas baton-lagip dagiti Ilokano a nagtrabaho iti kaunasan iti Hawaii sadiay Salomague Porte, Barangay Salomague, ditoy nga ili idi Disiembre 15.

Mismo nga inatenderan da Vice Governor Deogracias Victor Savellano; Danny Villaruz, presidente ti Ilocos Surians Association of Hawaii (ISAH); Hawaii State Representative Romy Cachola; dati a representante iti Hawaii Felipe Abinsay, Jr.; Ben Cabreros, ken dagiti opisial dagiti nadumaduma a town chapter ti ISAH iti Ilocos Sur ti pannakaikkat iti abbong ken pannakabendision ti Sakada Shrine, kas pammigbig kadagiti nagkauna nga Ilokano a napan nagtrabaho iti kaunasan ti Hawaii a nagtrabaho.

Timmabuno met iti okasion dagiti konsehal ti ili, barangay officials ken dadduma pay a sangaili a pakaibilangan ni Jerome Balisi, manager ti Philippine Ports Authority Terminal Manager

Iti pangablaaw a bitla ni Mayor Edgardo S. Cobangbang, Jr., kinunana nga ipamatmat ti isasangbay dagiti sangaili manipud iti Hawaii iti Cabugao ti agtultuloy a napintas a panaglalangen dagiti kadaraan nga Ilokano iti Estado ti Hawaii ken dagiti agindeg ditoy nga ili.

Kinuna pay ni Cobangbang a rumbeng laeng a taldiapan dagiti sakripisio dagiti Sakada agsipud ta babaen kadakuada, nagun-od dagiti kadaraan nga Ilokano ti balligi ken nangayed nga arapaapda.

Kalpasan ti panangikkat da Cobangbang, Abinsay, Villaruz, ken Salomague Kagawad Perla de la Cruz iti abbong ti marker ti monumento, binendisionan ni Father Felix Costales, kura paroko iti Cabugao.
Kinuna ni Abinsay nga agserbi ti Sakada Shrine a baton-lagip ken historikal a marker iti daydi panagbiahe ti grupo dagiti Ilokano a nagturong iti Hawaii tapno agtrabahoda iti kaunasan sadiay.

Kinuna met ni Vice Governor Deogracias Victor Savelleno nga ipamatmat ti monumento ti naindaklan a pakasaritaan dagiti Sakada.

Isuda dagiti pioneer nga OFWs ket rumbeng a mabigbig ken maikkanda iti agnanayon a pakalaglagipan, innayon ti bise gobernador.

Kas pammigbig iti liderato ni Cobangbang iti pannakaipatakder ti Monumento ni Sakada, inyawat dagiti taga-Hawaii ti plake ti pammadayaw iti mayor. Sabali met a pammadayaw ti naited iti Barangay Salomague nga idadauluan ni Barangay Captain Eliseo R. Serrano.

Maipalagip a nagluas ti umuna a bunggoy dagiti Ilokano a sangapulo ket lima kadakuada ti taga-Candon nga agtrabaho iti plantasion ti unas iti Hawaii idi Nobiembre 1906. Nagluganda iti SS Doric, simmangladda iti Honolulu Harbor idi Disiembre 20, 1906 sada naipan iti Ola’a Sugar Plantation, Big Island nga immuna a nakaipakatanda nga agtrabaho iti kaunasan.

Naglugan met iti SS Maunawil ken SS Falcon a nagpundo iti Fort Salomague, Cabugao ti sabali a bunggoy dagiti Ilokano a napan nagtrabaho iti Hawaii sugar cane plantation idi 1946.#