BANNER: Seal of Good Governance inawat ti Ilocos Sur

Naiyawata idi Oktubre 27 ti 2016 Seal of Good Governance iti probinsia ti Ilocos Sur iti maysa a seremonia a naangay iti Sofitel Philippine Plaza.

Mismo a ni Governor Ryan Singson ti immawat manipud kada DILG Secretary Ismael Sueno ken Senator Sonny Angara ti nasao a pammadayaw a maited kadagiti probinsia a nakapatar kadagiti pagbatayan iti nasayaat a panangituray kas iti napintas a pinansial nga administrasion, sosial a proteksion ken kinasagana iti dumteng a kalamidad, kaadda iti makaguyugoy a panagnegosio ken pannakikompetision, urnos ken talna ken nasayaat a panangimaton iti aglawlaw.

Iti panangawatna iti pammadayaw, kinuna ni Singson nga isagutna daytoy kadagiti amin nga Ilocos Surians, kadagiti padana nga agtuturay iti probinsia, kadagiti amin nga stakeholders ken katulongan nga ahensia a nakikammayet a nakipagtrabaho iti gobierno probinsial para iti pannakatun-oy ti progresibo nga Ilocos Sur manipud idi nagtugaw iti puestona idi 2013.

Kinuna ni Singson a maragsakan nga immawat iti nasao a pammadayaw ta pammaneknek daytoy iti panagtrabahona ken initiatibona idinto nga innayonna a maysa met daytoy a dakkel a karit kenkuana a mangsustener iti nasayaat a panangituray ken iti pannakaragpatna iti daytoy kadagiti sumarsaruno a tawen.

Immawat ti probinsia iti cash award a P4 million a maaramat para kadagiti nadumaduma a pangpadur-as a programa nangruna iti pannakapasayaat iti serbisio iti salun-at kadagiti amin nga ospital iti probinsia.

Daytoy ti maikadua a gundaway nga immawat ti probinsia iti pammadayaw manipud iti DILG. Immuna nga inawat ti Ilocos Sur ti seal of good housekeeping idi 2012. (Manipud iti report ti PIO Ilocos Sur)