BANNER: Suspek iti pannakapapatay MMSU coed, birbiroken ti polis

BATAC, Ilocos Norte – Sapsapulen dagiti pannakabagi ti linteg ti suspek iti pannakapapatay iti maysa nga estudiante a babai a nasarakan a maysan a bangkay iti igid ti highway ti Barangay San Cristobal, Sarrat, Ilocos Norte idi Agosto 4.

Saan pay a nasapulan dagiti polis ni Victorino Wania Mangabat, Jr., aka Francisco “Kiko” Ortega, 29, tubo iti Cauayan, Isabela, kangrunaan a suspek iti pannakapapatay ni Jemima Kezia Andres, 19, senior student iti Mariano Marcos State University nga agturpos koma ita a tawen iti Bachelor of Arts, Major in English, ken residente iti Barangay Caunayan, ditoy a siudad.

Awanen ni Mangabat, agraman ti inana ken ti putotna iti pagkaskaseraanda a balay idi napan tinunton dagiti polis sadiay Barangay Aglipay, Batac, Ilocos Norte.

Kanaig daytoy, nagapela ti ama ti biktima a ni Reynaldo Andres, mannurat iti Bannawag Publications ken empleado iti MMSU communications and media relations office, ken ni Governor Imee Marcos para iti pannakaited iti hustisia iti anakna.

Nangitanggaya pay ni Andres iti kantidad kas gunggona iti asinoman a makaited iti impormasion para iti pannakatiliw ni Mangabat nga idi damo, maipagarup a kabagian ti maysa a nangato nga agtuturay iti La Union ngem idi agangay, naammuan a maysa laeng nga alias ti inaramatna a nagan ken apeliedo.

Segun iti inisial a panagimbestiga dagiti polis, ni Mangabat ti kaudian a kadua ti biktima sakbay a nasarakan a maysan a bangkay.

Mapapati a sinukon ni Mangabat ti biktima iti Bacucang, Batac a nagaramidan ti biktima ken kakaduana iti group project. Nagluganda iti puraw a Mitsubishi Montero Sport nga addaan plaka a NEO 733.

Kabigatanna, nasarakan laengen ti bangkay ti balasang iti igid ti highway ti Barangay San Cristobal, Sarrat, Ilocos Norte. Mapapati a nagsagaba ti biktima iti tama iti paltog iti ulona a puon ti nakatayanna.

Iti rekord ti LTO, nakarehistro ti Mitsubishi Montero a mapapati a nagluganan ni Mangabat idi sinukonna ti biktima iti maysa a Ma. Carmelita Fernandez Santos, residente iti No. 67-D Consult Street, Fairview, Quezon City.

Madama ti panagimbestiga ti polis no carnapped ti lugan.

Kinuna ni Andres a nagpakada ti anakna nga umian iti balay ti maysa a kaklasena ta adda aramidenda a proyektoda iti klaseda.

Kinunana a nakaawat pay iti text a naggapu iti selpon ti anakna a dumawdawat iti P15,000.00 a maipatulod iti maysa a Francis Domingo Ortega agsipud ta awan kenkuana ti IDna.

Innayon ni Andres a tinawaganna ti anakna kalpasan a naipatulodna ti kuarta ngem saanen a simmungbat daytoy.

Naammuanna laengen a ti anakna ti nasarakan a bangkay iti ili ti Sarrat.#