BANNER: Suspek iti pannakapapatay MMSU coed, napaltogan, pimmusay iti ospital

TUGUEGARAO CITY – Maysa nga aldaw kalpasan ti pannakapaltogna sadiay Barangay Gadda idi Enero 18, pimmusay iti ospital a nakaitarayanna ti suspek iti pannakapapatay ti maysa a coed ti Mariano Marcos State University, Batac, Ilocos Norte.

Segun ken ni Tuguegarao City Chief of Police, Supt. Jessie Tamayao, pimmusay idi agarup 2:40 ti malem ti Enero 19, ni Victorino Mangabat, Jr., gapu ta naadasan iti dara bayat ti panangopera kenkuana dagiti doktor ti Cagayan Valley Medical Center tapno maikkat ti bala ti cal. 9 mm. pistol a simrek iti makannigid a barukong ti suspek.

Kinuna ni Tamayao nga immun-una ngem daytoy, idi Enero 14, naitimbre iti kapolisan ti numero ti plaka ken kolor ti Mitsubishi Montero Sport a lugan ni Mangabat kalpasan a saan a nagbayad ti suspek idi nagpakarga iti maysa a gasolinaan iti Tuguegarao. Naala ti kamera ti CCTV ti numero ti plaka ti lugan.

Segun ken ni Tamayao, nakita ti puraw a Montero iti asideg ti maysa a bar iti siudad ngem pinanggep ti suspek ti naglibas isu a kinamat dagiti polis a nagtungpal iti pannakasapgid ti lugan ti suspek iti sumagmamano a sasakyan sakbay a dinungparna ti Comelec checkpoint barricade.

Timmaray ni Mangabat ken ti inana, ngem kinamat ida dagiti polis agingga iti naipiskotda dagitoy.

Ngem mapapati a ginammatan ti suspek ti paltog ti maysa a polis ket iti panaginnagawda, aksidente daytoy a pimmutok a nakatiruan ti akingato a paset ti makannigid a barukong ti suspek.

Kinuna ni Tamayao a naisalakanda ti maysa a babai a taga-Bicol Region a mapapati a naallukoy a simmurot kadagiti agina kalpasan a nakarian iti trabaho iti ballasiw-taaw ngem inaramat laeng ti suspek para iti illegal a panagrekrutda sadiay Metro Manila ken dua ti tawenna nga ubing a lalaki nga idi agangay, naammuan nga anak ti suspek.

Kinunana a sumangsango n i Mangabat iti sumagmamano a kaso a pakaibilangan ti pannakapapatay ti maysa a estudiante ti MMSU.

Nasarakan ti bangkay ni Jemima Kezia Andres, 19, senior student iti MMSU, iti igid ti highway ti Barangay San Cristobal, Sarrat, Ilocos Norte idi Agosto 4, 2015. Nagsagrap ni Andres iti tama ti paltog iti ulona a puon ti nakatayanna.

Iti panagimbestiga dagiti polis, sinukon ni Mangabat ti balasang iti Bacucang, Batac City a nagaramidan ti biktima ken kakaduana iti group project ket nagkuyogda a pimmanaw a nakalugan iti puraw a Mitsubishi Montero Sport nga addaan plaka a NEO 733.

Kabigatanna, nasarakan laengen ti bangkay ti balasang iti igid ti highway ti Barangay San Cristobal, Sarrat, Ilocos Norte.

Kinuna ni Tamayao a carnapped ti Montero Sport. Iti rekord ti LTO, nakarehistro ti Mitsubishi Montero a mapapati a nagluganan ni Mangabat idi sinukonna Andres iti maysa a Ma. Carmelita Fernandez Santos, residente iti No. 67-D Consult Street, Fairview, Quezon City.

Ngem kinuna ni Tamayao a mapukaw metten dagiti sangsanguen a kaso ni Mangabat gapu iti pannakatayna. (Tawid News Team)