BANNER: Suspek iti pannakapapatay ti maysa a barangay captain, naaresto

SINAIT, Ilocos Sur – Natnag iti ima dagiti pannakabagi ti linteg ti kangrunaan a suspek iti pannakapapatay ti maysa a barangay captain iti barangay San Ramon, Magsingal, Ilocos Sur idi Nobiembre 11, 2010.

Naaresto ni Edgar Sinco y Sayo, 33, mangngalap ken residente iti Barangay Pug-os, ditoy nga ili, babaen dagiti nagtitipon nga elemento ti Ilocos Sur Criminal Investigation and Dectection Course (ISCIDT) nga indauluan ni Police Chief Inspector Arbel Mercullo, Ilocos Sur Provincial Public Safety Company (ISPPSC) nga indauluan ni Police Inspector Jurex Urbano ken Sinait police bayat ti insayangkatda nga operasion babaen ti bileg ti warrant of arrest nga inyisio ni Judge Nida B. Alejandro ti Branch 24, Regional Trial Court, Cabugao, Ilocos Sur.

Ni Sinco ti kangrunaan a suspek iti pannakapapatay ni Denmark Bueno y Remullar, 35, naasawaan, Barangay Captain ti Resurreccion, San Juan, Ilocos Sur idi agsapa ti Nobiembre 11 idi napan a tawen.

Kaitultulod ni Bueno ti anakna iti St. Williams Institute ket ibueltana koman ti luganna nga L300 tapno aggawiden idi immabay ti maysa a motorsiklo, dimsaag ti triggerman ket pinaputokanna ti biktima iti sumagmamano a daras a nagsagrapan daytoy iti patal a sugat iti abaga, bakrang ken tianna.

Mapapati a sinurot dagiti suspek ni Bueno agingga iti St. Williams Institute a nangiwayatanda iti pammapatay.

Nainagan ni William Palecpec a residente iti Barangay Malapa-ao, Langiden, Abra a kadua ni Sinco a nangisayangkat iti pannakapapatay ni Bueno.

Pormal nga insaklang ti ISCIDT da Sinco ken ni Palecpec iti kaso a murder mainaig iti pannakapapatay ni Bueno ket naiyisio ti warrant of arrest maikontra kenkuana idi Hunio 1, 2011.

Agdama a mabirbirok ni Palecpec nga addaan iti standing warrant of arrest manipud iti probinsia ti Abra ken addaan agur-uray a gunggona a P140,000 para iti pannakaarestona.

Maysa a gun for hire, nakalista ni Sinco a No. 1 iti Organized Crime Group (OCG) New Target List ken No. 2 iti Police Provincial Office Order of Battle.#