BANNER: Suspension order ti Tagudin mayor, konsehal, nasabat iti protesta

VIGAN CITY, Ilocos Sur – Addan iti Department of Interior and Local Government no kasano nga iyimplementarna ti 60-day preventive suspension maikontra ken ni Tagudin Mayor Roque Verzosa, Jr. ken ni Konsehal Arthur Chua.

Daytoy kalpasan a saan a naipakat ti suspension order maikontra ken ni Verzosa ken ni Chua agsipud iti panagprotesta dagiti supportersda.

Sakbayna, imbilin ni Governor Ryan Luis Singson ti pannakasuspenso dagiti dua nga opisial kas maibatay iti rekomendasion ti Sangguniang Panlalawigan babaen ti butos a 12-0 a mapakatan dagitoy iti 60-day suspension maigapu iti reklamo iti panag-quarry iti Tagudin.

Naireklamo da Verzosa ken ni Chua iti grave misconduct, gross insubordination, abuse of authority ken conduct unbecoming of a public official.

Kas maibatay iti reklamo da Noreen Sibayan, Gemma Tiu, Joel Pastores ken Provincial Environment and Natural Resources Officer Raymund Sinay, imparit ni Verzosa ti panag-quarry iti Amburayan River iti baet nga adda permit dagiti quarry operators manipud iti gobierno probinsial ken iti Provincial Environment and Natural Resources nga idadauluan ni Sinay.

Kalpasan ti pannakaipila ti complaint, nangipasa ti sangguniang bayan ti Tagudin iti resolusion a nangibilin iti pannakaisardeng ti panag-quarry iti nasao a lugar ngem saan nga inawat ti sangguniang panlalawigan.

Idi Hulio daytoy a tawen, inaprobaran ti provincial board ti Resolution No. XVI a nangiyendorso ken ni Singson iti pannakasuspenso ni Verzosa ken ni Chua gapu ta “adda probabilidad a mainpluensiaan dagiti respondente dagiti saksi wenno agpeggad ti seguridad ken integridad dagiti rekord ken dadduma pay nga ebidensia.”

Kalpasan a naawatna ti rekomendasion ti provincial board, imbilin ni Singson ti pannakasuspenso dagiti dua nga opisial idinto a kinunana nga iti babaen ti Local Government Code, ti probinsia ti addaan iti otoridad a mangkanselar wenno mang-revoke iti quarry permits a naiyisio a legal, saan ket a ti municipal mayor.

Ngem iti pannakaisurat daytoy, di pay naipakat ti suspension order maikontra kada Verzosa ken Chua gapu iti panagprotesta dagiti supporterda.#