Banner: Truck, napabettakan bomba, 3 soldado nadundunor

BANTAY, Ilocos Sur – Tallo a soldado ti nadundunor kalpasan a napabettakan ti truck a nagluganansda  iti eksplosibo kabayatan ti ilalasatna sadiay Barangay Bacsayan ditoy nga ili idi agsapa ti Abril 16.

Madama ti panagpalutpot ti kapolisan no kameng ti CNN wenno komunista a rebelde dagiti nangpabettak iti eksplosibo.

Segun iti report a dimmanon iti Ilocos Sur Provincial Police ditoy, nagsagrap iti dunor iti nadumaduma a paset ti bagida da MSgt. Narciso Aromin y Gapuz, 48, naasawaan, residente iti AP Apartment, Fort Magsaysay, TSgt. Carlos Luna y Tumbali,  47, naasawaan, residente iti Brgy. Villa Maria, Enrile, Cagayan ken Pfc. Jerwin Alvarez y Garcia, agpapadada amin a kameng ti  Philippine Army 81st Infantry Batallion 7th Infantry Division a nakabase iti Brgy. Bugbuga ditoy nga ili.

Iti inisial a panagimbestiga dagiti polis-Sta. Cruz, agdaldaliasat ti KM 250 truck a nagluganan ti tropa ti gobierno iti barangay road iti agpadaya a direksion ket idi makadanonda iti Barangay Bacsayan, kellaat a bimtak ti eksplosibo a naimuntar ken naibitin iti kawkawati ken ipil-ipil. Kas resulta, nagsagrap dagiti biktima kadagiti dunor iti nadumaduma a paset ti bagida a pinataud dagiti iron cast nails.

Segun ken ni Barangay Turod Kagawad Milagros Fajardo, idi agarup 6:00 ti malem ti Abril 15, nakitana ti dua a lalaki nga adda awitda a back pack a nagturong iti nakapasamakan ti panagpabettak iti eksplosibo.

Kinuna ti kagawad nga agarup 8:30 ti agsapa ti sumaruno nga aldaw idi nakangegda iti eksplosion iti sumurok kumurang 100 metro manipud iti balayda.

Segun  met iti agassawa a Dante Jimeno, kalkalpasda a napan a timmabuno iti worship service ket agdaldaliasat ti traysikel a naglugananda  nga agpadaya iti nadakamat a barangay idi labsan ida ti truck a nagluganan dagiti tropa ti gobierno ket sumagmamano a minutos kalpasanna, nakangegda iti eksplosion ket nakitada dagiti soldado ti Philippine Army a dimsaag iti truck a mangsalaknib kadagiti kakaduada.

 

Kinuna met ni Cpl. Rusty Marara Valerio, sarsarunuen ti motorsiklo ti truck a nagluganan dagiti soldado nga agarup 10 metro ti baetda idi bimtak ti explosive device a naimuntar iti madre kakaw ken ipil-ipil sa nakitana ti maysa a lalaki a nagaruat iti puraw a tisirt ken nakapantalon iti maong a timmaray nga agpaamianan idinto a nagpukkaw daytoy iti “tumaraytayon!”

Inarayat ni Cpl. Valerio dagiti nasugatan a kakaduana sada intaray dagitoy iti Candon City Hospital babaen ti lugan ni Engr. Reynante Jaramilla, asawa ti barangay captain ti Bacsayan.

Iti clearing operation nga insayangkat dagiti tropa manipud iti Philippine Army ken Ilocos Sur Police Provincial Safety Command (ISPPC), nakarekobreda iti crime scene kadagiti iron cast nails, electronic wires ken dua a “AA” a bateria.

Maipalagip a lima a soldado ti nagudas ken innem ti nasugatan a kakaduada gapu iti panangtambang kadakuada ti mapattapatta a 30 a kameng ti Community Party of the Philippines/New Peoples’ Army/National Democratic Front (CNN) a pakaibilangan ti maysa nga Amasona, a nakaibilangan dagiti akusado idi sardam ti Pebrero 26 sadiay Kin Lourdes, Barangay Namitpit, Quirino, Ilocos Sur.

Lima a kameng ti CNN ken sumagmamano a John Does ken Jane Does ti nakasuan iti murder, frustrated murder ken frustrated homicde mainaig iti nasao a panagatambang.#