BANNER: Umat-atiddog a listaan biktima ti shooting incidents: 2 pay drug personalities naiwalang

SINAIT, Ilocos Sur – Agtultuloy nga umatiddog ti listaan dagiti drug personalities a napapatay ditoy probinsia kalpasan a naireport a dua manen a shooting incidents ti napasamak sadiay Sta. Maria idi malem ti Oktubre 12 ken ditoy nga ili idi malem ti Oktubre 13.

Karaman iti drug watch list a boluntario a simmuko iti Santa Maria police station idi kanikadua a bulan ti biktima ti pammaltog a napasamak iti Poblacion, Sta. Maria idinto a drug surrenderer ken nakalista a top 10 iti drug watch list iti Sinait ti napapatay iti mismo nga uneg ti pagtaenganna sadiay Barangay Paratong, Sinait.

Iti report a dimmanon iti Provincial Police Office, madama ti panagdiaging da Miguel Dizon II y Reyes, aka Jojo, 39, naasawaan, negosiante, ken ti asawana a ni Reyna iti dayaen a paset ti plasa ti munisipio idi agarup 5:30 ti bigat idi Oktubre 12 idi inasitgan ti dua a tao a nagaruat iti bonete sada pinaltogan ni Dizon iti sumagmamano a beses a nakatiruan ti nadumaduma a paset ti bagina.

Saan a naaan-ano ti baketna.

Naglibas a nagpaamianan dagiti di nabigbig a suspek kalpasan ti pammaltog. Saan a nailanad iti report no ania a klase a lugan ti getaway vehicle dagiti suspek.

Naitaray ni Dizon iti Reyes Clinic and Hospital, Sta. Maria sa naiyalis iti Ilocos Sur Central District Hospital, Narvacan a nakaideklaraanna a dead on arrival.

Nangiwayat dagiti polis iti hot pursuit operation ken pinatulodanda iti flash alarm dagiti kabangibangda a police stations ngem saandan a nakamatan dagiti suspek.

Iti panagimbestiga ti Kimat ken SOCO team manipud iti Crime Laboratory ti Candon City, nakarekobreda iti uppat a kapsula manipud iti M16 Armalite rifle.

Kabayatanna, maysa a Roland Ibarra y Pacis aka Lalan, 40, naasawaan, welder, ti ginudas dagiti suspek a nakaaruat iti helmet ken abungot iti rupa iti mismo nga uneg ti balay daytoy sadiay Barangay Paratong, Sinait.

Segun ken ni Maylene Ibarra y Inong, 40, asawa ti biktima, pinanawanna ti lakayna nga agbuybuya iti telebision idi napan nakikaarruba sakbay ti shooting incident.

Kinuna ni Maylene a bayat ti kaaddana iti kaarrubada, nakangeg iti kanalbuong manipud iti balayda ket idi rimmuar, nakitana ti dua a lalaki a nakaaruat iti helmet ken nakaabungot a naggapu iti balayda sada naglugan iti nalabaga a kotse a dagus a nagpakaskas iti daya a direksion.

Timmaray ni Maylene a napan iti balayda ket nakitana ti asawa a nakadalutaytayen iti suelo.

Intaray dagiti nagresponde a polis ken BFP personnel ti biktima iti Sinait District Hospital ngem saanen a naidanon daytoy a sibibiag.

Nakarekobre ti SOCO team manipud iti PCLO Ilocos Sur iti crime scene iti tallo a kapsula a nagtaud iti caliber 5.56; 2 a kapsula a mapapati a nagtaud iti cal .38; ken maysa a deformed slug. Sabali laeng ti buli a naala manipud iti kanawan a bagi ti biktima.

Karaman ti biktima kadagiti drug surrenderer ti Sinait police station idi Hulio 10 ken nakalista iti top 10 municipal level drug watch list.

Iti pannakaisurat daytoy, awan pay ti natiliw a suspek iti dua a pammapatay. (Tawid News Team)