BANNUAR 44

Sinurat ni Danny Antalan
(Maudi iti dua a paset)

Ta aklonentayo man ken saan, ti civil war ket mapasamak gapu ngarud ta adda ti saan a panagkikinaawatan iti kinarigat ti tao ken ili, prinsipio, pammati ken pagtaktakderan. Ket adda ti riribuk iti Pilipinas gapu ta makita dagitoy a problema. No dadduma, kasapulan ti mangiballaet tapno maikkan importansia dagitoy a problema. Ta di pay kabaelan ti Pilipinas a sungbatan dagitoy a problema iti bukbukodna. Umuna, agkurang ti abilidad ken resourcesna a mangsungbat kadagitoy; maikaddua, adu unay ti mannakibiang ken ti dadduma kadakuada ti kayatda laeng ti agkakuarta; maikatlo, di maitured ti Presidentetayo ti mangisayangkat ti total out war iti kadaraan a kabusortayo.

Ngem ti gubat ket synonyms ti riribuk. Daytoy ngarud kaudian a rumbeng nga aramiden ti maysa a gobierno-demokratiko a kayatna nga itandudo ti kappia. Ta kasano koma a maaddaan iti kappia no namunganay iti gubat? Saan nga all-out-war! Saanto pulos mabalin a ti gubat ti mangidateng ti kappia iti maysa a pagilian. Ti kappia ket mapasamak iti nariribuk nga estado ket maaramid babaen met laeng iti nainkappian a wagas. Ket iti biang ti MILF, daytoy ket babaen ngarud iti Bangsamoro Basic Law a mangipaayen ti naan-anay a kappia iti Mindanao.

Daksanggasat met no dadduma, ta sa la mainaganan ti maysa a bannuar manipud iti gubat. Kaadduan a bannuar ket timpuar manipud iti gubat—Andres Bonifacio, Jose Rizal, Gregorio del Pilar, Isabelo Abaya ken dadduma pay a nagan a nagbalinen a paset iti pagadalantayo iti Araling Panlipunan. Uray iti ruar ti pagilian ket adda dagiti nagan a timman-ok manipud iti gubat, Alexander The Great, Richard The Lionheart, Napoleon Bonaparte, ken uray pay ni Saladin ken Douglas MacArthur ken Malala Yousafzai.

Ngem mabalin ngata ti bannuar ket saan koma met a maipasngay iti gubat? Wen. Ngem manmanoda a kas ken ni Benigno Aquino.

Isu nga aklonentayo lattan, dagiti bannuar ket kaadduanna manipud iti gubat. Ta isuda ngamin ket nakasaganada a mangisebba ti biagda. Kas dagiti 44 a kameng ti SAF a natay kalpasan ti panangipatungpalda iti pagrebbenganda.

Ngem sa laeng agbalin a namaay ti maysa a banag no adda pagtungpalanna. Isu’t gapuna a sapay koma a ti panakatay dagitoy 44 a pulis ket adda pagtungpalanna. Dayta a pagtungpalanna ket isu koma ti kapintasan a katukad ti sakripisio. Dayta a sakripisio ket ti naan-anay koman a kappia iti Mindanao a nabayagen nga inadipen ti kinakarigat gapu iti nakas-ang a riribuk.

Sapay koma ngarud ta agbalin a natan-ok ti pannakatay dagiti 44 a SAF a pulis. Sapay koma ngarud ta maipaay ti pudpudno a kappia iti tedtedda ti gubat a Mindanao. Sapay koma ngarud ta maipatungpal ti kangrunaan a gagem ti maysa a pagilian—ti nakappia nga isu ti tulbek ti progreso wenno panagdur-as t maysa a lugar. Sapay koma ta adda pagmaayanna dagitoy a sakripisio, saan ket a pagpuonan laeng ti media mileage dagiti sumagmamano nga ambisioso a pulitiko ken opisial a kayatna la maaddaan iti name recall iti pagilian.

Ania man ti pagmaayanna ti pasamak—kayatko a saluduan ita ti 44 a bannuar ti pagiliantayo.#