BANNUAR 44

Sinurat ni Danny Antalan
(Umuna iti dua a paset)

Di mapagduaduaan, bannuaren dagiti 44 a kameng ti Special Action Forces (SAF) a napapatay bayat ti ranget idiay Mamasapano idi rautenda ken mapapatay ni alias Marwan wenno ni Zulkifli bin Hir. Maysa a terorista iti sangalubongan ken eksperto maipanggep iti bomba, ni Marwan ket kameng ti Jemaah Islamiyah a responsable iti adu a pammapatay a pakairamanan ti insidente idiay Bali, Indonesia.

Daksanggasat ta kalpasan ti balligi nga operasion, di nagballigi dagiti pannakabagi ti linteg a makaawid a nakaradkad. Nasabet ken nakirangetda iti grupo ti Bangsamoro Islamic Freedom Fighters (BIFF) ken ti Moro Islamic Liberation Front (MILF).

Daksanggasat ta 44 ti natay a kameng ti SAF, 18 ti natay iti MILF, 5 iti BIFF ken sumagmamano ti nasugatan. Ngem kangrunaan iti collateral damage—ti Bangsamoro Basic Law wenno BBL a mangguped koman iti nabayagen a gubat iti Mindanao. Agraman a natungday ti namnamaen koman a progreso gapu kadagiti proyekto ken programa a maipaay kadagiti umili nangruna kadagiti kakabsat a Muslim.

Nagango ken naangrag ti bulong a sipsippiten ti puraw a kalapati. Intayab ti kali ti arapaap tunggal Muslim a maaddaan koma metten iti kappia ti rehionda. Namantsaan ti gakat a pirma laengen ti kurangna tapno agsardeng ti gubat.

Ket ita, agtultuloy manen ti gubat iti nagbaetan ti Kristiano ken dadduma a Muslim iti abagatan. Piman, adu a lulua kadagiti madandanagan, biktima, marigrigat, mangnamnama, umili ken opisiales ti naregreg iti daga a mano a dekadan a mangkamkamat iti kappia.

Ania ti pagturongan itan ti kappia? Saludsod ti tunggal maysa.

Manipud iti insidente ti ranget iti dayta a disso, nagbalin a kontrobersial ken dakkel nga isyo iti pagilian a nanggabur iti imbestigasion ken ni Bise Presidente Jejomar Binay gapu kadagiti maibatbato a kunniber nga inaramidna. Nakaanges pay ket ngatan ni Binay gapu ta temporario a nagsardeng ti rikos ti imbestigasion kaniana.

Kas kinunak, nagsanga dagiti pakasaritaan iti dayta a ranget—nupay maymaysa ti kangrunaan, ti panagbalin a sikat ken bannuar dagitoy 44 a pulis. Dagiti sanga ti isyo a pakairamanan no apay nga awan nauray a suporta manipud iti Armed Forces of the Philippines. Pinnabasol ken tinnudo iti ima iti imbestigasion iti Senado. Ket ita, addan awag iti pannakapatappuak manipud iti Malakanyang ken ni Presidente Benigno Simeon Aquino III.

Adda kadi nalimed nga ima ni Uncle Sam iti operasion nga insayangkat ti SAF? Daytoy ita ti rumrummuar a sarita no apay a nagtured a rimmaut ti pulisia iti disso—a kasla ketdin dida talken ti AFP nga isu koma ti mayannatup a mangisayangkat ti raut. Apay ngata? Sabagay, mairaman latta ti Amerika iti isyo gapu ta isuda met ti paggapuan ti gatad a $6 a milion a gunggona iti siasino man a makaitudo ken ni bumubomba a ni Marwan a responsible iti pannakatay ti adu nga Amerikano idiay Bali, Indonesia a paborito a pagpallailangan dagiti turista.

Diak ammo no apay a kuestionaranda ti tulong ti Amerika iti Pilipinas mainaig iti operasion ti SAF? Gapu ta ganggannaet ti mangtultulong iti operasion tapno agballigi? Ngem apay a mayat latta met no maisayangkat idiay Malaysia ti saritaan iti Bangsamoro Basic Law? Makaulaw no dadduma—nangruna ta Malaysian met ni Marwan. Madi ngata no mayat a tumulong ti Malaysia, mayat a tumulong ti Amerika, ken mayat ti amin a pagilian tapno magun-odan ti pudpudno a kappia iti pagilian?

Mayat!

(Adda tuloyna)