MAGSINGAL, Ilocos Sur – Indagadag ti fire marshall ditoy nga ili ti saan a panangpanaw dagiti agpugpugon ti lutuenda a tabako tapno malapdan pannakauramda.
Kinuna ni Bureau of Fire Protection Marshall Teddy Fariñas a maysa kadagiti makagapu iti pannakauram ti pugon dagiti maregreg a bulong ket no saan a dagus a masiputan, dumarang ket masilaban dagiti dadduma pay a bulong nga agtungpal iti pannakauram ti pugon.
Indagadagna pay ti panagikabil dagiti agpugpugon iti screen iti nagbaetan ti heater ken dagiti naisad-ay a maluto a bulong ti tabako tapno adda manglapped iti panagdissoda iti heater ken saanda a dumarang.
Itay nabiit, addan sumagmamano a naireport a nauram a pugon a dimmapuan dagiti malutluto a bulong ti tabako, agraman ti pugon.#