STO. DOMINGO, Ilocos Sur -Rinaut dagiti miembro ti ISCIDG ti maysa a paginuman iti Barangay Calay-ab iti parbangon ti Nobiembre 22 ket naisalakanda ti maysa a menor de edad nga agtrabtrabaho iti nasao a bar.
Insayangkat dagiti elemento ti ISCIDG nga indauluan ni PCI Napoleon P. Duquez, WACCO ken WCPD HQS iti panangidaulo ni PSI Napoleon D. Cruz a nakabase iti Camp Crame, Quezon City, ti rescue ken anti-trafficking in persons operation iti Jeje Bar a masarakan iti nadakamat a barangay gapu iti pulong ti maysa a Ruby Reyes, residente iti 2058 Lozado St., Pandacan, Manila nga agtrabtrabaho iti nasao a bar ti anakna a ni Anna Carissa Libaton y Reyes, 16.
Nagresulta ti operasion nga inimatangan ti ABS-CBN Network iti pannakaisalakan ti nasao a menor de edad ken ti pannakaaresto ti akinkukua iti bar a nabigbig a maysa nga Efren T. Tabieros ken ti empleadona a ni John David T. Enfante.
Naipan ti menor de edad ken dagiti suspek iti WACCO/WCPD-HQS CIDG iti Camp Crame para iti dokumentasion ken disposision.
Makasuan dagiti suspek iti panaglabsing iti Anti-Human Trafficking Act in Persons.#