Barangay, awan pay sekretario ken tesorerona

SANTIAGO, Ilocos Sur – Awan pay ti sekretaria ken tesorero ti Barangay Poblacion Norte ditoy nga ili, daytoy ti naammuan iti barangay captain ditoy itay nabiit.

Kinuna ni Kapitan Richard Tengsico ti Poblacion Norte, nga awan pay laeng ti nadutokan a sekretaria ken tesorera ti Barangay Poblacion Norte nupay nabayagen a nalpas ti eleksion agsipud ta saan a kinanunongan ti lima a kagawadna dagiti dinutokanna nga agtakem.

“Kualipikado met dagiti dinutokak ken awan met ti pamilawan kadakuada ngem saanda nga immanamong,” kinuna ni Tengsico.

Kabayatanna, iti pannakiuman ti DZTP ken ni Provincial DILG Officer Victoria Ramos,  inlawlawagna nga awan la ketdi ti nalabsing kadagiti basic requirements ken qualifications, awan ti rason tapno saan a maikkan iti concurrence ti madutokan a sekretario ken tesorero.

Maipalagip nga addaan ti barangay captain iti bileg a mangdutok iti sekretario ken tesorero ti barangay ngem masapul ti concurrence ti majority dagiti kagawad.#