Barangay bagsakan, naipasdek iti Barangay Puro, Magsingal

MAGSINGAL, Ilocos Sur – Inyawat ti Department of Agriculture Regional Field Office I iti panangidaulo ni Regional Executive Director Atty. Cipriano Santiago ti proyekto ti ahensia a barangay bagsakan iti Barangay Puro ditoy nga ili idi Nobiembre 4.

Inyawat ni Santiago ti P50,000 kas puonan, maysa a weighing scale ken 20 a plastic crates iti Rural Improvement Club (RIC) ti nadakamat a barangay a naituding a mangtarawidwid iti nadakamat a proyekto.

Iti eksklusibo nga interbio ti Around Ilocandia Channel ken ni Santiago, dinawatna kadagiti mangimaton a saanda koma nga agpannuray laeng kadagiti produkto nga adda iti barangay no di ket isuda ti mangidanon kadagiti inaldaw-aldaw a kasapulan dagiti agindeg babaen ti panagangkatda met kadagiti produkto manipud iti sabali a barangay wenno iti sentro.

“Ti pannakapaadda ti food security ti barangay ti gagem ti proyekto, isu a masapul a dakayon ti manggatang iti produkto dagiti bumarangay kas iti natnateng manipud iti talon ken lames manipud iti baybay tapno dakayo ti mapan mangilako iti sentro. Iti panagawidyo, gatangenyo metten iti sentro dagiti masapul dagiti kabarangayanyo tapno dakayon ti gumatanganda,” indagadag ni Santiago.

Ti Barangay Bagsakan iti Puro ti maikatlon a proyekto Nga impasdek ti Departamento ti Agrikultura ditoy probinsia. Immuna ditoy ti naipatakder iti Sabang ken Salomague, Cabugao.

Kabayatanna, nagyaman ni Marife Tabisula, presidente ti RIC, iti gundaway nga inted ti DA iti asosasionda a mangimaton iti nasao a proyekto ti barangay idinto nga inkarina nga imatonanda a nasayaat ti bagsakan ta makatulong daytoy iti tunggal pamilia iti Puro.

Iti maysa a teleconference, inkari ni Gov. Luis “Chavit” Singson kadagiti opisial ti barangay iti panangidaulo ni Barangay Captain Angelito Torricer ti personal nga ibibisitana iti Puro tapno pagsasaritaanda ti dawat ti kapitan a pannakabangon ti permanente a pasdek para iti bagsakan.

Innayon pay ti gobernador a mangipasdek ti gobierno probinsial iti mini ice plant ken block freezer iti lugar tapno pumaut ti kinapresko dagiti makalapanda a lames.

Ipadpadas itan ti gobernador ti posible a pannakaiyestablisar ti teleconference iti tunggal programa iti nadumaduma a paset ti Ilocos Sur tapno makainnumanna dagiti lumugar ken makitana ti situasionda uray adda iti ruar ti probinsia tapno makipatpatang kadagiti padana a gobernador ken investors a mayat nga agpuonan iti Ilocos Sur.#