: Barangay Captain a nangkarit iti police officer, nakasuan | Tawid News Magazine - Weekly Ilocos News đŸ“°

Barangay Captain a nangkarit iti police officer, nakasuan

STA. CATALINA, Ilocos Sur – Napilaan iti kaso ti maysa a barangay captain kalpasan ti mapapati a panangkaritna iti maysa a police officer ken panangbassawangna iti maysa nga opisial ti Commission on Elections ditoy nga ili idi malem ti Oktubre 20.

Napilaan ni Chris Conrad Navarro, barangay captain ti Barangay Poblacion ditoy nga ili, gapu iti panangbassawangna ken ni Municipal Comelec officer Marivic Castañeda ken panangkaritna ken ni Police Inspector Manuel Viaje, officer in charge ti police station ditoy a napasamak idi agarup alas 3:00 ti malem ti Oktubre 20 iti auditorium/covered court ti ili.

Segun iti report, isagsagana da Castañeda babaen ti pannakikammayet dagiti polis nga indauluan ni Viaje ti pakaangayan ti candidates’ forum iti auditorium idi simmangpet ni Navarro ket mapapati a pinagsasawanna ti Comelec officer ken kinaritna ti police officer.

Mapapati a nakainom ti barangay captain.

Inaresto dagiti polis ni Navarro, impanda iti Gabriela Silang General Hospital para iti mediko legal nga eksaminasion sada insubli iti police station para iti pannakaipila ti kaso maikontra kenkuana.

Naammuan a makiar-areglo ti nasao a barangay captain kada Castañeda ken Viaje.

Agpailayon a barangay captain ni Navarro iti masungad nga eleksion dagiti opisial ti barangay inton Oktubre 25.#

Enhanced by Zemanta