Barangay captain elect, nakaawat iti death threat

CABUGAO, Ilocos Sur – Nasurok a dua a lawas kalpasan ti pannakaangay ti barangay ken SK elections, saan pay a nagtalna ti Barangay Turod ditoy nga ili gapu kadagiti mapapati a panagpaputok ken naawat a death threat ti nangabak a barangay captain.

Iti report a dimmanon iti polis ditoy nga ili, maysa a death threat ti naawat ni nangabak a barangay captain Inocencio Sadac idi Nobiembre 3 a mangipangpangta iti pannakapapatayna no saan nga aglusulos iti puestona. Mapapati a naggapu ti surat iti NPA.

Sakbayna, naireport a masansan ti pannakangeg dagiti bumarangay kadagiti kanalbuong iti rabii a mapapati nga impaputok ti naabak a kandidato para barangay captain iti nasao a barangay.

Segun iti report, nasarakan ti maysa nga agindeg ti poster a naikabil iti asideg ti kapilia ti barangay ket nakalanad ti: Inocencio Sadac, mag-resign ka sa barangay at kooperatiba kung gusto mo pang mabuhay.

Natalian ti poster iti nangisit a ribon ket nakalanad iti baba a naggapu ti ballaag manipud iti Ilocos Sur-Abra NPA Command, Maradudon-Tineg Chapter  Liquidation-Salvage Section.

Mapapati a naaramat laeng ti NPA iti nasao a death threat. Iti pannakaisurat daytoy, awan pay ti kumpirmasion wenno panangilibak ti NPA nga isuda ti nangipatulod iti ballaag.

Kinuna met ni Major William Nerona, hepe ti polis ditoy, a malaksid iti NPA, kitkitaenda pay ti anggulo a dagiti makagurgura wenno dagiti met laeng kinabalubal ti nangabak a barangay captain ti naggapuan ti death threat.

Naireport pay iti polis ti mapapati a panagpaputok iti paltog ti naabak a kandidato iti kinabarangay captain.

Iti report a dimmanon iti polis, nakita ni Sadac ken sumagmamano a kalugaranna ni Expedito Soto, ti kinasangona para barangay captain, nga umin-inom iti maysa a tienda ket kalpasan ti sumagmamano a minutos kalpasan ti panaggawid daytoy, nakangegda kadagiti paputok ken pukkaw a: “Bakla, rummuarka dita ta agpinnaltogta.”

Ngem idi napan nagimbestiga dagiti polis, awan ni Soto iti pagtaengan daytoy. Imbaga ti asawa ni Soto kadagiti polis nga adda ti asawana iti Vigan City.

Kanaig daytoy, pinaayaban ni Nerona ni Soto ket pinalagipanna a no mapaneknekan a daytoy ti agpappaputok iti Barangay Turod ket mabalin a pakaidarumanna iti reckless discharge of firearm.

Daytoy nga ili ti maysa a siniputan ti kapolisan gapu kadagiti nagsasaruno nga insidente ti pammaltog.

Dua nga aldaw sakbay ti barangay elections, nagreport ni Mayor Eddie Boy Cobangbang a pinaltogan ti maysa a security guard a mapapati a pasurot ni kandidato idi ngem barangay elect itan Wilfredo Terrago bayat ti kaaddana iti Barangay Daclapan.

Naipilan ti kaso a double attempted murder maikontra ken ni Jayson Ryugi Sugano y Belo, residente iti Barangay San Jose, Candon City.

Idi agarup alas 6:20 ti Oktubre 23, napapatay ni Roger Sinco y Mar, 33, baro ken residente iti Sitio Padual, Barangay Pug-os.

Napapatay met bayat a magmagna ni Reagan Salmo y Rubio iti agarup alas 9:20 ti rabii iti daytoy met laeng nga aldaw iti barangay Sisim, ditoy nga ili.

Idi Oktubre 22, napaltogan ni Arjune Ibarra y Pacis bayat ti panagdaliasatna a nakalugan iti motorsiklo iti national highway a sakup ti Barangay Pug-os ditoy met laeng nga ili babaen dagiti suspek a naglugan iti traysikel.#