BANTAY, Ilocos Sur – Saan siguro a nagustuan ti barangay kapitan iti Ora West ditoy nga ili ti panagkanta ti kalugaranna iti videoke idi rabii ti Hulio 5 isu a pinaturonganna iti paltog ken kinigtotna daytoy.
Nagpulong iti polis ni Alex Pino y Tabalanza, 51, naasawaan, mannalon, ken residente iti Barangay Ora West ditoy met laeng nga ili a pinaturongan ni Barangay Captain Dennis Presto iti paltog gapu iti panagkantana iti videoke bayat ti selebrasion ti kasangay ti apona.
Segun ken ni Pino, idi agarup alas 9:00 ti rabii ti nadakamat a petsa, pinasardeng dagiti tanod ti panagkantana iti videoke ngem dimmawat iti pawayway.
Madamdama, simmangpet ni Presto ket mapapati a pinagsawanna pay iti dakes ni Pino, inkasana ti cal. 45 a paltogna sana pinaturongan ni Pino.
Pimmanaw met laeng ti kapitan ken dagiti barangay tanod kalpasanna.
Impulong pay ni Pino a ni Presto ti mapapati a nagpaputok iti nagsasaruno a daras idi sardam ti Hulio 6.
Madama ti panagimbestiga dagiti polis mainaig iti nasao nga insidente.#