Barangay captain naguyugoy mangraman iti mapapati a shabu

CANDON CITY – Posible a saan a nasimbeng ti panagut-utek daytoy a tao ta pati dadaulo ti barangay ket inyopresaranna iti maiparparit a droga.

Resulta: tiniliw ti barangay kapitan sana inreport iti police station ket iti kaudian a report, pinilaan met dagiti polis iti kaso a panaglabsing iti RA 9165..

Idi agarup 4:00 ti malem ti Abril 18, nakaawat ti police station ditoy iti report manipud ken ni Parioc 1st Barangay Captain Dante Gadiano nga adda tiniliwna a kalugaranna a nagikut iti droga.

Nagresponde dagiti polis ket insuko ni Gadiano kadakuada ni Lloyd Toquero y Bienan, 30, naasawaan.

Segun ken ni Gadiano, inawis ti suspek a ramananna ti mapapati a shabu a naikabil iti small heat sealed plastic sachet.

Naipan ni Toquero ken ti nakumpiska iti ikutna iti Candon City police station para iti umisu a disposision ken dokumentasion.#