Barangay captain nailayon a presidente ti liga gapu iti teknikalidad

LIDLIDDA, Ilocos Sur – Gapu iti teknikalidad, nagtungpal nga awan ti kinasango ti maysa a barangay captain para presidente ti liga dagiti barangay captain ditoy nga ili.

Nailayon a presidente ti liga ni Barangay Captain Ponciano Segundo agsipud ta awan ti kinasangona para iti nasao a posision.

Sakbayna, ninamnama dagiti dadaulo ti barangay a risiris ti panagbubutos para iti kinapresidente ti liga gapu ta naipadpadamag nga adda ipasango ni Mayor Constante Segundo a kasango ti incumbent a presidente ti ABC ditoy nga ili.

Kadua ni sigud a Mayor Jesus Sagay ni Barangay Captain Segundo. Agkasupanget iti politika ni Sagay ken ti agdama a mayor.

Mismo a nagturong ni DILG Provincial Director Victoria Ramos iti Lidlidda tapno isu ti mangimaton ti panagbubutos.

Ngem naklaat laengen dagiti barangay captain ta nagtungpal nga awan ti kinasango ni Barangay Captain Segundo para presidente ti liga dagiti kakapitan.

Ti rason? Idi nagipila dagiti tallo a kasango ni Barangay Captain Segundo iti kandidaturada, inlanadda a para ABC ti pagkandidatuanda.

Inlawlawag ni DILG Provincial Director Victoria Ramos a saan a posision ti ABC ken saan a nalawag no para presidente, bise presidente wenno board of director ti nagtarayanda.

Kinuna ti provincial director a pinirmaan dagiti kasango ni Barangay Captain ti impilada a kandidatura isut gapuna a nagtungpal a ni laeng Barangay Captain Segundo ti maymaysa a kualipikado a tumaray a para presidente.

Kabayatanna, kas ninamnama, awan ti kinasango ti grupo ni incumbent ABC Federated President Noel Singson iti panagpilida kadagiti baro nga opisial ti ABC ditoy siudad. Dagiti sumaganad dagiti kabarbaro nga opisial ti ABC ditoy siudad: ABC Fed. President Noel Singson kas presidente, Barangay Captain Ernesto Calindas, bise presidente, Barangay Captain Albert Abaya,  auditor.

Dagiti board of directors:  da Barangay Captains David Wagayen, Avelino Remolacio, Ruben Sanchez, Romeo Ramos, Marcelo Gagarin, Wilfredo Cobangco, Pepito Sanchez ken Modesto Gacutan.#