Footer

BaRangay demo farm, naggatang iti bukel ti mangga agingga iti Hunio 12

SAN JUAN, Ilocos Sur – Nagtuloy met laeng ti panaggatang ti BaRangay demo farm ti gobierno probinsial ditoy kadagiti bukel ti mangga gapu iti kiddaw dagiti umili a maikkanda iti pawayway a mangilako kadagiti naurnongda a bukbukel.

Daytoy ti kinuna ni Dr. Cesar Soller, project coordinator ti BaRangay demo farm, a “win-win solution” tapno mapagustuan ti amin, nangruna dagiti umili nga adu ti naurnongda a bukel ti mangga nga ilakoda.

Kasungani daytoy iti immun-una a waragawag ni Soller a saanen nga aggatang ti BaRangay demo farm kadagiti bukel ti mangga no di ket dagiti naparusingen a mangga.

Gapu iti waragawag ni Soller, nagriri dagiti umili a nagur-urnong kadagiti bukel ti mangga gapu ta kasapulan metten a parusingenda pay dagiti mangga sakbay a mailakoda iti BaRangay demo farm.

Kinuna ni Soller a gapu iti daytoy, inrekomendada ken ni Gov. Deogracias Victor Savellano a mangtedda iti pawayway nga aggatang iti bukel ti mangga nga inaprobaran met ti gobernador.

“…agsipud ta adu dagiti dumawdawat ken nagapela, aggatangkami iti bukel ti mangga agingga iti June 12 up to midnight,” kinuna ni Soller iti interbio kenkuana ni Salvador Tambua a naipatangantang iti DWRS.

Iti napalabas, pinadas ti gobierno probinsial ti naggatang kadagiti bukel ti mangga ngem saan a kinagat dagiti umili gapu ta P.10 laeng ti paggatangna kada bukel.

Ingngato ti gobierno probinsial ti panaggatangna iti P.50 kada bukel tapno ad-adu ti maawis nga aggurnong iti bukel ti mangga.

Ngem gapu ta naduktalanda nga adu dagiti bukel ti mangga a nailako kadakuada ti saan a nagtubo, nangipakat dagiti aggatang iti reseko kas pangsullat kadagitoy saan nga agtubo a bukel ti mangga.

Maysa nga agrikulturista ti nagkuna a saan nga agtubo ti naganus unay a bukel ti mangga ken dagiti addaan iti dadael.

Iti kaudian a waragawag ni Soller, kinunana nga aggatangda  iti P1 kada naparusing a bukel ti mangga nga Indian, Hawaiian ken P2 kadagiti naparusing a bukel ti native a mangga.#