Footer

Barangay health workers, saan a political appointees nga ikkaten…: DOH regional director

BANTAY, Ilocos Sur – Imbatad  ti regional health director a saan a political appointees dagiti barangay health workers isu a saan a mabalin a pagikkaten lattan ti barangay kapitan.

Kinuna ni Dr. Eduardo Janayro, regional health director, nga adda dagiti report a dumandanon iti opisinana a nga ip-ipiten dagiti kapitan ti barangay  dagiti barangay health workers nga agikkatdan iti puestoda aglalo dagiti saan a kimmadua kadakuada iti Barangay ken SK elections idi Oktubre daytoy a tawen.

Impalagip ni Janayro a ti laeng mismo a barangay health worker  ti mabalin a mangibaga nga agikkaten kas boluntario nga agserserbi a saan ket a pagikkaten ida ti kapitan wenno asinoman a municipal officials gapu laeng iti pulitika.

“Boluntario dagitoy, saan a ket a political appointees,” kinuna ni Janayro idinto nga inggunamgunamna a  rumbeng ketdi a nayonan dagiti maseknan ti bilang dagiti BHW iti lugarda tapno madanon ti ratio a maysa a barangay health worker iti tunggal 20 a households.

Kanaig daytoy, maysa a surat ti pinirmaan ni Gov. Deogracias Victor “DV” Savellano a naiturong kadagiti amin a kapitan ti barangay a rumbeng a suportaranda dagiti BHW ket saanda nga iramraman dagitoy iti politika ta boluntario ti ipapaayda a serbisio a makatulong kadagiti bumarangay nangruna iti agdama nga adu dagiti agraira a sakit.

Segun ken ni Savellano boluntario dagiti BHW nga agserserbi para iti pannakamantiner ti salun-at iti barbarangay ket maibilangda kas “unsung heroes” gapu ta isuda ti kabinnulig ti turay tapno awan ti agsakit a kaprobinsiaan.

Iti surat ni Savellano, kinunana a sisusuporta iti pannakaprotekta ti karbengan dagiti BHW particular iti panangsupiat iti damag a pagik-ikkaten dagiti sumagmamano a kapitan dagiti BHW a saan a simmuporta kadakuada iti napalabas nga eleksion.

Imbilin pay ti gobernador nga ireport a dagus dagiti BHW ti reklamoda iti asinoman nga opisial iti mismo nga opisinana wenno kadagiti helplinesna tapno maaksionan dagitoy a problema.

Tapno maparegta pay dagiti BHW, nagiwaras ni Savellano iti death aid cards kadagitoy bayat ti Maika-12 a Barangay Health Workers Congress a naangay itay Nobiembre 21 iti Quirino Stadium ditoy.

Babaen itoy a programa ti gobernador, umawat ti pamilia ti matay a BHW iti P10,000-P20,000 kas death aid depende iti klase ti ipapatay.

Ti tema ti nasao nga okasion: “Salun-at Ipangpangruna Tapno Panagbiag Gumin-awa Umili Agtignayka”.#