Barangay iti Dagupan City, Regional Gawad KALASAG Awardee

SAN FERNANDO CITY – Napadayawan kas Regional Gawad KALASAG Awardee ti Brgy. Mangin ti Siudad ti Dagupan iti programa nga inangay ti Office of Civil Defence iti Police Regional Office ditoy idi Enero 12.

Inawat ni Barangay Captain Bernard Cabison ti tropeo, nadumaduma nga early warning devices para iti barangay ken P30,000 a gunggona gapu iti pannakapili ti Barangay Mangin a Regional Gawad KALASAG Awardee.

Kinuna ni Cabison a ti inaramidda a 3D maps ti barangayda ti kangrunaan a makaigapu iti pannakapadayawda. Makita kadagitoy a mapa dagiti paset ti Brgy. Mangin a mabalin a pakapasamakan dagiti nadumaduma a didigra kas iti panagreggaay ti daga ken layus.

Nakapaskil dagitoy a mapa iti barangay hall ti nadakamat a barangay ket dakkel ti naitulongda iti pannakalapped ti pannakaapektar dagiti agindeg bayat ti iduduprak dagiti bagyo a Mina, Pedring ken Quiel itay napan a tawen.#