Barangay kagawad, 2 kinainomna, napaltogan

STA. CRUZ, Ilocos Sur – Nasuroken a makalawas sipud pay napaltogan ti maysa a barangay kagawad ken dua a kaduana, awan pay ti suspek iti nasao nga insidente.

Nupay kasta, agtultuloy ti panagimbestiga ti kapolisan mainaig iti pannakapaltog da Carmelo Javillonar y Nalaoagan, 55, naasawaan, mannalon; Jose Bermudez y Lozano, 53, naasawaan, negosiante, agpada a residente iti Barangay Sagat, Sta. Cruz, Ilocos Sur ken Edgar Bustillos y Crisostomo, 49, naasawaan, barangay kagawad, residente iti Brgy. Nagtenga, Sta. Cruz, Ilocos Sur.

Madama ti panaggiinom dagiti tallo iti sango ti Bermudez Store idi agarup 7:20 ti sardam ti Enero 14 idi kellaat a nagparang ti maysa a lalaki a nakakallugong, nakaaruat iti nangisit a diaket ken nakapantalon iti maong sana pinarutupot dagiti biktima.

Naitaray dagiti biktima iti Sta. Lucia District Hospital ngem naideklara ni Javillonar a dead on arrival iti balay-pagagasan.

Naiyalis da Bustillos ken Bermudez iti Razonable Hospital, Candon City.

Nangiwayat ti polis-Sta. Cruz ken clustered KIMAT iti hot pursuit operation ngem negatibo ti resultana.

Iti panagimbestiga ti SOCO team manipud iti Candon City Crime Laboratory Office, nakarekobreda iti 14 a kapsula manipud iti cal 5.56 iti crime scene.#