Barangay kagawad ginudas dagiti riding in tandem

MAGSINGAL, Ilocos Sur – Barangay kagawad manen ti nagbalin a biktima dagiti armado a tattao a nagkalubbon iti motorsiklo iti umuna nga aldaw daytoy a bulan.

Saanen a naidanon pay a sibibiag iti Magsingal District Hospital ni Warlito Garcia y Oclos, 40,  naasawaan, barangay kagawad, karpintero ken residente iti Barangay Pagsanaan Norte, kalpasan a ginudas dagiti armado a tattao a riding in tandem iti national highway a sakup ti Barangay Barbarit ditoy met laeng nga ili idi agarup alas 7:10 ti rabii ti Hunio 1.

Segun iti report a dimmanon iti polis ditoy, agpaamianan a direksion da Garcia, nakamotorsiklo a kaluganna ni Alex Padua y Felipe, 41, naasawaan, ken kalugaranna, ket idi makadanonda iti nadakamat a lugar, inabay ida dagiti suspek a nakaaruat iti helmet ken bonite a nakalugan iti Jumper motorcycle a maris dapo sa pinaltogan ti nakalugan iti likud a nakapuntaan ti ulo ni Garcia.

Naikras ti motorsiklo ket mapapati a naipalladaw ni Padua idinto a naglibas dagiti suspek a nagturong iti saan nga ammo a direksion.

Gapu iti kapardas ti pasamak ken iti pannakaikrasda, saan a nailasin ni Padua dagiti nagisayangkat iti pammapatay.

Nakasarak dagiti inbestigador iti tallo a kapsula a nagtaud iti cal .45 pistol iti nakapasamakan ti krimen.

Saan pay a nabigbig dagiti suspek a nangisayangkat iti pammapatay ken no ania ti motibo ti pannakapapatay ti biktima.#