Barangay kagawad, kumplotna, naipiskot iti checkpoint

STO. DOMINGO, Ilocos Sur – Dua a lalaki a pakaibilangan ti maysa a barangay kagawad ti natiliwan  nga agikut iti droga iti checkpoint nga impasdek dagiti polis iti Barangay Calautit ditoy nga ili idi bigat ti Marso 15.

Nabigbig dagiti natiliw a da Marito Tuzon y Tadeja, 48, naasawaan, barangay kaga-wad, ken ni Roderick Aglosolos y Tabu, 31, naasawaan, mannalon, agpada a residente iti Barangay Quimmarayan, ditoy nga ili.

Segun iti report, maysa a confidential informant ti nangalerto kadagiti polis a lumasat dagiti suspek iti nadakamat a lugar kalpasan a napanda gimmatang iti droga iti maysa a balay sadiay Magsingal, Ilocos Sur.

Dagus a nangipasdek dagiti polis iti checkpoint iti Barangay Calautit.

Idi sumungad dagiti suspek a nakalugan iti motorsiklo, pinasardeng dagiti polis ida ngem pinakaskas ketdi ni Tuzon ti motorsiklo, isu nga imbalangan dagiti polis ti patrol car iti dalan.

Nakita dagiti polis nga idi dimsaag ni Tuzon, adda impalladawna a bassit a banag a naammuan idi agangay a maysa a plastic sachet a nagkarga iti mapapati a shabu.

Iti panagrikisa dagiti polis, nakaalada iti maysa a bassit a sachet a naglaon iti mapapati a shabu residue iti ikut ti backrider a ni Aglosolos; sabali pay ti bassit a heat sealed plastic sachet ti naalada iti compartment ti motorsiklo.

Nakasamsam pay dagiti polis iti ikut ni Tuzon ti maysa a Samsung cellphone, nangisit a wallet a nagkarga iti P7,904.00 iti nadumaduma a denominasion, professional driver’s license, HK 10 dollars, ken 2 disposable lighters.

Nakaala met dagiti polis iti ikut ni Aglosolos iti maysa a Myphone cellphone, P45.00, disposable lighter, ken 5 sticks ti Marlboro cigarettes.

Iti pannakaisurat daytoy, maisagsaganan ti kaso a panaglabsing iti RA 9165 maikontra kadagiti dua a suspek.

Kabayatanna, napilaanen iti kaso a panaglabsing iti RA 9165, RA 10591 ken Comelec gun  ban maikontra ken ni Brylle John Azcxueta y Palorigan, 23, residente iti Barangay Pug-os, Cabugao, Ilocos Sur iti provincial prosecutor’s  office, Vigan City.

Maipalagip nga idi bigat ti Marso 11, sinukisok dagiti polis-Cabugao ti balay ni Azcueta  a nagresulta iti pannakakumpiska ti maysa a Cal. 398 revolver nga addaan iti dua a bala a nakasukbit iti siket ti suspek; Samsung cellular phone; plastic container a nagkarga iti 4 a medium heat sealed tnsparent plastic sachet a naglaon iti mapapati a shabu; maysa a bundle ti assorted nga awan naggianna a sachets, disposable lighter, ken maysa a naiputok a cartridge shell a naikabil iti sling shoulder black bag.#