Barangay kagawad, nagudas babaen inay-ayamna a paltog

NARVACAN, Ilocos Sur – Maysa a barangay kagawad ti naireport a nagudas kalpasan a pimmutok ti paltog a nagay-ayaman nga impaturong iti ulona bayat ti panagiinomda idiay Sitio Limmansangan, Barangay Margaay, ditoy nga ili idi rabii ti Marso 1.

Immuna a naitaray ni Restituto Cabunoc, Jr. y Corrales, 54, naasawaan, barangay kagawad ken residente iti Barangay Dinalaoan, ditoy met laeng nga ili, iti Central Ilocos Sur District Hospital sa naiyalis iti St. James Hospital, Vigan City ngem indeklara ti doktor a nangtaming kenkuana nga awanen ti biagna.

Segun iti report, sakbay ti insidente, naggiinom ti biktima ken ti kasinsinna a nainaganan Fidel Cacas y Corrales iti paraangan ti balay daytoy, kaduada da Marvin Sanches y Velasco, 20, baro, ken Randy Silva y Pira, 30, naasawaan, agpada a residente iti Barangay Lungog, ditoy met laeng nga ili.

Mapapati nga inruar ti biktima ti paltogna a Norinco cal .45 pistol, nagpaputok iti sumagmamano a daras;  kalpasanna, impaturongna ti paltog iti ulona sana kinalbit ti gatilio.

Nagkanalbuong ti paltog ket nagsagrap ti biktima iti sugat iti makannawan a pispisna.

Nakarekobre dagiti polis iti lima a kapsula manipud iti cal .45 iti nakapasamakan ti pammaltog.

Bayat ti pannakaisayangkat ti inbestigasion, boluntario nga insuko ni Fidel Cacas ti paltogna a cal .45 Taurus pistol idinto nga inannugotna a nagpaputok met bayat ti panagiinomda.

Agtultuloy ti panagimbestiga dagiti polis mainaig iti nasao nga insidente.#