Barangay kagawad, napapatay iti kautongan

NARVACAN, Ilocos Sur – Napapatay ti maysa a barangay official bayat ti panagpurosna iti utong iti Barangay Nanguneg East ditoy nga ili idi agsapa ti Marso 16.

Naammuan ti nasao a pammapatay babaen ti panangireport ni Barangay Captain Elvie Cabradilla ket innagananna ti biktima a ni Santos Andallo Cardona, 50, naasawaan, barangay kagawad  ti nadakamat a barangay.

Iti inisial a panagimbestiga dagiti polis, naammuan nga agpurpuros ni Andallo iti utong iti talonna iti asideg ti Imelda National High School idi inasitgan ti di pay nabigbig a tao ket pinaputokanna ti biktima iti sumagmamano a daras a nakapuntaan ti bagi ken ulo daytoy a puon ti dagus a nakatayanna.

Kinuna met ni Rosita, asawa ti biktima, nga adda iti dalanna nga agturong iti talonda idi makangeg iti tallo a nagsasaruno a putok ket nakitana ti maysa a lalaki a mangisalsalikad iti paltogna sa nagtaray a nagpadaya.

Kinuna ti baket a nakaaruat iti nangisit a t-shirt ken ababa a pantalon ti suspek.

Nakarekobre dagiti inbestigador iti maysa a kapsula ken maysa a buli a mapapati a naggapu iti cal .45 iti nakapasamakan ti krimen.

Iti pannakaisurat daytoy, di pay ammo ti motibo ti krimen.#