Barangay kagawad, natiliw iti drug buy-bust operation

STA. LUCIA, Ilocos Sur – Inaresto dagiti operatiba ti kapolisan ti maysa a kagawad ti barangay kalpasan a positibo ti resulta ti buy bust operation nga insayangkatda maikontra iti suspek iti sango ti maysa a pagtagilakuan iti sarming ken aluminum sadiay Barangay Barangubong, ditoy nga ili idi malem ti Enero 19.

Saan a nakaresistir idi arestaren dagiti nagtitipon nga elemento ti Sta. Lucia Police Station, ISSET, ken PAIDSOTG ti nasao nga opisial a nabigbig iti nagan a Rogelio Limbo y Peralta, 45, naasawaan, ken residente iti Barangay Paratong, ditoy nga ili, kalpasan a nakumpiska iti ikutna ti lima a pedaso ti heat sealed plastic sachet a nagkarga iti mapapati a shabu, dua a P500.00 a marked money, maysa a selpon a Nokia, 3 nga aluminum foil nga addaan iti mapapati a marijuana residue, maysa a disposable lighter, maysa a getteng ken maysa a metal lighter.

Iti pannakaisurat daytoy, naiyendorson ti kaso ni Limbo a panaglabsing maikontra iti RA 9165 iti opisina ti assistant provincial prosecutor, Candon City.

Kabayatanna, naisaklang metten itay Enero 22 ni Danhanly Lozano y Saldevar, baro, addaan legal nga edad, ken residente iti Barangay Nagtenga, Sta. Cruz, Ilocos Sur iti kaso a panaglabsing iti RA 9165 iti City Prosecutor’s Office, Candon City.

Maipalagip a natiliw ni Lozano babaen ti buy bust operation nga insayangkat ti nagtipon nga elemento ti Sta. Cruz Police Station, ISPAIDSOTG ken PDEA sadiay Barangay Sidaoen, Sta. Cruz idi rabii ti Enero 21.

Nakakumpiska dagiti polis iti ikut ti suspek iti maysa a heat sealed sachet a naglaon iti dua a babassit a heat sealed sachet a nagkarga iti mapapati a shabu, P1,000.00 a buy-bust money, ken maysa a lighter a nabungon iti aluminum foil.#