Barangay kagawad, natiliwan nga agikut iti paltog; makasuan panaglabsing iti Comelec election gun ban

MAGSINGAL, Ilocos Sur – Dua pay a lalaki a pakaibilangan ti maysa a barangay kagawad ti agkakaso gapu iti panaglabsingda iti election gun ban iti agtultuloy a panangipakat ti kapolisan iti daytoy a pammilin ti Commission on Elections tapno natalna ti panagpipili inton Mayo 2016.

Nairaman iti umat-atiddog a listaan dagiti agkakaso iti panaglabsing iti Comelec election gun ban da Francisco dela Cruz y Cariaga, 42, naasawaan, incumbent barangay kagawad ken residente iti Barangay Sarsaracat, Magsingal, Ilocos Sur; ken Rolen Corpuz y Acupiado, 25, caretaker, ken residente iti Barangay 2 Garreta, Badoc, Ilocos Norte.

Inaresto dagiti polis-Magsingal ni dela Cruz gapu ta nakitada a nakasakbit ti maysa a paltog iti siket daytoy bayat ti kaaddana iti Love Story Videoke Bar a masarakan iti Barangay Panay Norte, Magsingal, Ilocos Sur idi agarup 2:00 ti bigat ti Pebrero 5.

Dagus a kinumpiska dagiti polis ti nakasakbit iti siket ti kagawad a Norinco 1911 Cal. 45 nga adda nakasulbong a magasin a nagkarga iti pito a bala.

Kabayatanna, bitbit ni Corpuz ti maysa nga M16 rifle idi nasalamaan dagiti pulis a nagresponde kalpasan a nakaawatda iti pulong iti kaadda iti nagtagiarmas a lalaki iti Sitio Baliw, Barangay Quezon, Cabugao, Ilocos Sur.

Sakbayna, nagpulong ni Mark Anthony Molina y Somera, 24, ken residente iti Barangay Pantay Laud, Vigan City a kinabil ti grupo dagiti lalaki iti uneg ti paraangan ti Two Brothers Poultry Farm idi agarup 11:50 ti Pebrero 3.

Iti pulongna iti polis, kinuna ni Molina a bayat ti panaggiinomda kada Corpuz a kayongna ken sumagmamano a kaduada, naparnuay ti nabara nga argumentoda ken ni Angelo Corpuz y Acupiado a nagtungpal iti panagdinnuronda. Ngem nakibiang dagiti dadduma pay a kainomda ket mapapati a nagtitinnulonganda a kinabil ni Molina.

Mapapati nga inruar ni Rolen Corpuz ti riplena nga M16 ngem ginammatan ni Molina sana inmalo iti sementado a suelo sa pimmanaw ket inreportna ti napasamak iti police station.

Nadatngan dagiti nagresponde a polis ni Rolen Corpuz a nakabitbit pay laeng iti M16 nga awan magasin ken balana ket kinumpiskada ti paltog sada inaresto ti suspek idi awan ti maipakitana a dokumento ken otoridad nga agikut ken agbitbit iti paltog.

Iti pannakaisurat daytoy, maisagsaganan ti kaso a panaglabsing iti RA 91650, ken Comelec election gun ban maikontra kada Dela Cruz ken Corpuz.

Immun-una ngem daytoy, lima a tattao ti naaresto gapu iti panaglabsingda iti election gun ban iti nagsasaruno nga operasion nga inwayat ti kapolisan sadiay Vigan City, Burgos, Magsingal, ken San Juan idi Enero 30 ken 31.

Idi Enero 30, naaresto ni Alfredo Cinense y Eliseo, 75, naasawaan, ken residente iti Barangay Luna, Burgos kalpasan a nagpositibo ti search operation nga insayangkat polis-Burgos iti balay daytoy a nakasamsamanda iti maysa a Hydra M16 rifle (5.56); 6 long magazines para M16; 2 short magazine para M16; ken 95 balbala para iti dayta met laeng a kalibre.

Nakadetenen ti suspek iti police station ti Burgos idinto a naiyawaten ti kasona a panaglabsing iti RA 10591 iti piskalia.

Sabali met a search operation ti impakat dagiti nagtitipon nga elemento ti kapolisan a pakaibilangan ti PNP Vigan CPS, PDEA ISSET 1, PAIDSTOG ISUR PPO ken PIB ISUR ti sadiay Barangay Nagsangalan, Vigan City idi met laeng Enero 30 a nagtungpal iti pannakakumpiska saan laeng dagiti mapapati a droga ken drug paraphernalia no di pay maysa a Cal 38 revolver; 2 hand grenades; 5 bala para Cal 38; 3 bala para cal 9mm; ken maysa a bala para cal. 7.62.

Nasaklangan metten ti akimbalay a ni Gil Barcena Medrano, 51, awanan asawa, ken residente iti Barangay Nagsangalan, Vigan City iti panagsalungasing iti Rep. Act 9165, RA 10591 ken RA 8294.
Maysa met a trabahador ti natiliw iti uneg ti maysa a videoke bar a masarakan iti Barangay Panay Norte, Magsingal idi rabii ti Enero 30 gapu ta nakasukain dagiti polis iti shoulder bag a bitbit ti suspek a nainaganan idi agangay a ni Edgar Verazon y Asuncion, iti Remington Rand Inc. 1911 cal. 45 pistol nga addaan nakasulbong a magasin a nagkarga iti 6 a bala, ekstra a magasin nga adda kargana a 5 a bala, holster ken voter’s ID.

Nagsuspetsa dagiti polis ken ni Verazon, 49, construction worker, ken residente iti Barangay Parada, Sto. Domingo idi nagtaray daytoy nga immuneg iti videoke bar idi umasidegda. Kinamat dagiti polis ni Verazon agingga iti naipiskotda ket idi sukimatenda ti bag daytoy, naduktalanda a nagkarga kadagiti paltog ken balbala.

Nakakustodia ti suspek iti police station ti Magsingal.

Idi agarup 5:30 ti agsapa ti Enero 31, sinukisok dagiti operatiba a pakaibilangan ti PIB, ISPPSC, ken San Juan police station, ti balay ni Manolito Vita y Gascon, 55, mannalon, ken residente iti Barangay Caronoan, San Juan ket nakasamsamda iti cal .45 Norinco pistol; 3 magazine assembly, ken 8 balbala para iti dayta met la a kalibre.

Nakadetene metten ti suspek.#