Nagtudo iti grasia iti Barangay Lesseb

STA. MARIA, Ilocos Sur – Nagtudo ti grasia iti Barangay Lesseb iti naisayangkat a Kapitol Outreach Program ditoy nga ili itay nabiit.

Kinuna ni Gov. Ryan Singson nga inted ti gobierno probinsial amin dagiti inlista dagiti barangay officials ti Lesseb a kasapulanda iti daytoy a panangisayangkatda iti Kapitol Outreach Program ditoy nga ili.

Kinuna ti gobernador a panagsubalitna daytoy iti Barangay Lesseb gapu iti pannakaibbong ti kinasangona iti kinagobernador iti probinsia idi napalabas nga eleksion.

Idi panagkakampania, inkari ni Singson ti pannakaited iti gunggona a multicab iti barangay a mangibbong iti kasangona iti kinagobernador idi May 2013 elections.#