Footer

Barangay nutrition scholars, health workers, dimmalan iti organic farming seminar

SAN JUAN, Ilocos Sur -Kas paset ti programa ti gobierno probinsial a panagsubli iti nakaisigudan a panagtalon kas sungbat iti nangina a presio ti komersial a ganagan ken problema iti malnutrision, dimmalan iti panagsanay iti organiko a panagtalon dagiti barangay nutrition scholars, barangay health workers ken farmer leaders manipud iti Cabugao a naangay iti BARang-ay Demofarm ditoy idi Nobiembre  6.

Segun ken ni Provincial Nutrition Action Officer  Editha Castillo, napateg ti Bio-intensive gardening iti backyard, communal ken school gardening kasta metten iti panagtaraken iti manok, kalding ken dadduma pay a dingnguen tapno mapaksiat ti kinapanglaw iti barangay.

“Babaen ti Bio-intensive gardening mapasublitayo ti kinataba ti daga ken masigurotayo pay a nadalus ken nasustansia dagiti ipaunegtayo a taraon a mangitunda iti kinasalun-at ti pamiliatayo,” inlawlawag ni Castillo  idinto nga inallukoyna dagiti partisipante tapno agmulada iti natnateng iti arubayanda wenno iti paso (no awan ti umdas nga espasio).

Indawat pay ni Castillo  nga ipaset dagiti nagsanay  dagiti nasursuroda kadagiti kabarangayanda tapno maisaknap dagiti impormasion.

Inlawlawag met ni Dr. Cesar Soller, agpapaay kas project manager ti BARang-ay nga  agserbi daytoy a proyekto kas ehemplo kadagiti kaprobinsiaan iti benneg ti agrikultura isu a silulukat ti BARang-ay kadagiti amin nga interesado a makaadal.

Karaman kadagiti naiyadal iti seminar ti panagaramat iti bulbulong, rugit ti dingnguen ken dadduma pay a marunot (biodegradable) a banag a masarakan iti aglawlaw tapno mausar kas abono, pestisidio ken insektisidio.

Nagibunong pay iti office of the Provincial Agriculturist (OPAG) kadagiti bukel ti balangeg, pechay, paria, karabasa, kamatis ken tarong a mabalin a pangrugian dagiti partisipante tapno maipakatda dagiti inadalda.#