Barangay officials, ag-uniporme, agsuot iti ID

SAN JUAN, Ilocos Sur – Maipatungpalen ditoy nga ili ti panagusar dagiti amin a barangay officials uniporme ken identification card.

Kinuna ni ABC President Edwin Singson a malaksid iti ID, agaruat payen dagiti barangay officials iti uniporme tapno mapagbalinda a propesional iti panangakemda iti pagrebbenganda.

Nakabusbos ti Liga iti P30,000.00 manipud iti bukodna a pondo para iti nasao nga ID system, segun iti ABC president.

Naammuan nga adda pay dua a clerk a suelsueldoan ti Liga manipud iti pondona.

Initiatibo ti Liga dagiti konsehal ditoy nga ili ti panagaruat dagiti amin a barangay officials iti uniporme ken ID.#