Barangay officials, saan a naibiang iti swine dispersal ti NTA?

SINAIT, Ilocos Sur – Linagidaw ti barangay captain ti Sallacapo ditoy nga ili ti saanda a pannakaibiang a barangay officials iti naiwaras a taraknen a burias ken pagpakan kadagitoy iti barangayda.

Mapapati a ti laeng Barangay Sallacapo ken Zapat ti winarasan ti National Tobacco Administration iti sag-125 a burias idinto a 44 dagiti barangay iti Sinait, kasta met a sumagmamano laeng a bumarangay ti nakaitedan dagiti burias.

Alegasion ni Sallacapo Barangay Captain Savellano a dagiti laeng kakadua ti presidente ti gunglo dagiti agmulmula iti tabako ti nawarasan iti baboy a taraknenda.

Adda programa ti NTA a tumulong iti panagdur-as ti panagbiag dagiti agmulmula iti tabako babaen dagiti livelihood projects nga ipapaayna.#