Barangay tanod, bimmagsol; mannalon, timmagbat iti bisperas ti baro a t

NARVACAN, Ilocos Sur – Imbes a tumulong iti pannakatagiben ti urnos ken talna, bimmagsol ketdi daytoy barangay tanod a puon ti saanen a pannakibaro a tawen ti maysa kadagiti binagsolna.

Iti report manipud iti polis ditoy nga ili, napasamak ti pammagsol gapu iti saan a panagkikinnaawatan ti suspek ken ti biktima bayat ti drinking spree kas pangsarabo iti baro a tawen iti Sitio Kakaldingan, Barangay Lungog a nagtungpal iti pannakatay ti maysa kadagiti nabagsol.

Innaganan ti polis ti bimmagsol a maysa a Federico Gasmen y Puyot, 49, naasawaan, barangay tanod, idinto a nabigbig dagiti nabagsol a da Reynaldo Ortiz y Ordonio, 43, naasawaan, natibo iti Santiago City, Isabela ngem agnaeden iti nadakamat a barangay ken ni Melvin Picimo y Ocampo, 22, naasawaan, construction worker, kalugaranda met laeng.

Kuna ti report a bayat ti panaggiinom da Gasmen, Ortiz, Picimo ken dadduma pay a kaarrubada idi agarup 11:00 ti rabii ti Disiembre 31, naaddaan iti napudot nga argumento da Ortiz ken ni Gasmen ket binagsol ti tanod ti biktima iti sumagmamano a daras a nagsagrapan daytoy kadagiti sugat iti nadumaduma a paset ti bagina.

Mapapati a naganawa ni Picimo ngem binagsol ni Gasmen iti naminsan a nagsagrapanna iti sugat iti likudna.

Naitaray dagiti dua iti Central Ilocos Sur District Hospital ngem pimmusay ni Ortiz bayat ti pannakaagasna.

Boluntario a simmuko ni Ortiz ken ni POI Marlon Paulo, miembro iti SWAT-Ilocos Sur a a residente met iti nadakamat a barangay agraman ti patadem a naaramat iti pammagsol.

Naipaima ti suspek kadagiti nagresponde a polis sa naipan iti ospital para iti medikal a pannakaeksamenna.

Kabayatanna, napudot met nga argumento iti nagbaetan dagiti agkabsat ti ramut ti panangtagbat ti suspek iti biktima sadiay Barangay Manzante, Ilocos Sur idi agarup 10:30 ti rabii ti Disiembre 31.

Boluntario a simmuko ni Warlito Peralta y Tabin, 53, naasawaan, mannalon, ken residente iti nadakamat a barangay, kadagiti nagresponde a polis kalpasan a tinagbatna ti kabsatna a ni Aurelio, 47, bayat ti kapudot ti argumentoda iti dayta a rabii.

Segun iti panagimbestiga dagiti polis, mapapati a nakarurod ni Warlito bayat ti argumentoda ket ginammatanna ti maysa nga imuko sana tinagbat iti namindua ti kabsatna a nakasugatan ti ulo ken kannigid a takiag daytoy.

Nagtaray ti biktima ken naglemmeng iti kataltalonan sa nagpatulong kadagiti kaarrubada.

Naikustodia ti suspek iti polis station para iti umisu a disposision.

Mapapati a nakainom dagiti dua idi nagsubangda.#