Barangay tanod, binagsol ti kalugaranna

SANTA, Ilocos Sur – Nagringgor ti barangay tanod ken nakainom a kalugaranna bayat ti last canvassing iti plasa ti barangayda idi parbangonĀ  ti Mayo 24 a nagtungpal iti pannakabagsol ti tanod.

Nainaganan ti biktima a ni Joseph Britos y Bagorio, 46, naasawaan, idinto a nabigbig ti nangbagkong kenkuana a ni Francisco Carpio, Jr., y Burbano, 47, naasawaan, aglaglaga iti basket, kalugaran met laeng ti biktima.

Naammuan iti report manipud iti polis a bayat ti last canvassing iti plasa ti barangay, simmangpet ni Carpio a mapapati nga adda iti inpluensia ti arak ket nagsubangda iti tanod.

Inuksot ti suspek ti imukona ket binagsolna ti tanod iti namitlo a nagsagrapan ti biktima iti sugat iti nadumaduma a paset ti bagina.

Inaresto dagiti sabali a tanod ni Carpio ket impaimada daytoy kadagiti nagresponde a polis agraman ti imukona nga aggatiddog iti agarup 12 a pulgada agraman ti pangiggaman.

Naitaray ti tanod iti Gabriela Silang General Hospital, Tamag para iti pannakataming dagiti sugatna.#