Barangay tanod, ginudas dagiti ‘kakadua’

SINAIT, Ilocos Sur – Pimmusay iti ospital a nakaitarayanna ti maysa a barangay tanod kalpasan a pinaltogan dagiti armado a lallaki a masuspetsa a kameng ti New People’s Army sadiay Barangay Baracbac ditoy nga ili idi agarup 4:30 ti agsapa ti Pebrero 11.

Pimmusay ni Ludy Fedy Balete y Villegas, 52, barangay tanod, naasawaan, bayat ti pannakataming dagiti sugatna iti Corpuz Clinic and Hospital, Sinait.

Naitaray met iti nadakamat nga ospital ni Juliana Joy Agbayani gapu iti sugatna iti likud ken makannawan nga abagana sa naiyalis iti Mariano Marcos Memorial Hospital and Medical Center, Batac, Ilocos Norte.

Segun iti report manipud iti polis, idi agarup ala una ti parbangon ti Pebrero 11, dua a lalaki ti nagtugtog iti balay da Balete ket dimmawatda iti kape.

Imbaga dagiti dua a ‘kakadua’ dagitoy ket dimmawatda iti kape.

Segun iti report, ti misis ti biktima ti nagserbi kadagiti suspek.

Kalpasan ti panagkape dagiti dua, pimmanawda ngem nagsublida manen ket dimmawatda iti kape ken danum para kadagiti dadduma pay a kakaduada.

Idi agarup alas 4:30 iti dayta met laeng a parbangon, nakariing ni Balete ket nagturong iti pugonna, awitna ti apokona a ni Juliana. Idi makaasideg iti pugon, mapapati nga inayaban dagiti dua a suspek sada pinaltogan iti sumagmamano a daras a nakatiruan ti barukong ni Balete ken likud ken makannawan nga abaga ni Agbayani.

Naglibas dagiti suspek a nagturong iti kabambantayan a paset ti Barangay Baracbac, kuyogda ti cal. 45 a paltog nga inaramatda kas maibatay kadagiti lime a kapsula a narekobre dagiti inbestigador iti crime scene.

Saan pay nga ammo ti motibo iti pammapatay.

Ngem iti panangiyam-ammo dagiti pimmatay iti bagida a ‘kakadua, masuspetsa a kamengda ti lokal a terorista a grupo wenno New People’s Army.#