Barangay tanod, nalmes

SUYO, Ilocos Sur – Mapapati a nalmes daytoy biktima bayat ti kaaddana iti karayan a nakaikabilan ti pamupokanna iti ikan sadiay Barangay Cabugao ditoy nga ili idi agsapa ti Septiembre 1.

Nasarakan a naipit iti nagbaetan dagiti bato ken nairebreb ti kagudua ti bagina iti danum ni Rene Asuit y Suyat, 21, baro, barangay tanod ken residente iti nadakamat a barangay, idi agarup 7:15 ti bigat ti nadakamat a petsa.

Indeklara ti doktor iti rural health center a nakaitarayanna a natayen ti biktima.

Sakbayna, idi agarup 5:00 ti bigat dayta nga aldaw, napan kinita ti biktima ti pamupokanna iti ikan iti karayan ngem saanen a naggawid isu a pinabirok ni Barangay Captain Rolando Balcac ti tanod a nagtungpal iti pannakasarak ti bangkayna iti karayan a sakup ti Sitio Dalisis ti nadakamat met laeng a barangay.#