Barangay tanod, napaltogan bayat panagkalapna

SANTA, Ilocos Sur Adda pay iti ospital ti barangay tanod a biktima ti pammaltog idi sardam ti Mayo 3 agsipud ta kasapulan ti operasion ti napaltogan a gurongna.

Naammuan ti Tawid News a naparpar ti tulang iti gurong ni Roland Aslor y Capas, 35, baro, barangay tanod ken residente iti Barangay Taguiporo, Bantay, Ilocos Sur ket kasapulanna ti operasion.

Kanaig daytoy, nagpatulong ti asawa ti biktima iti DWRS babaen ti programa ni Jun Ramos a Barangay Commando para iti pannakasaranay ti asawana tapno makaur-or iti kuarta a kasapulan iti pannakaoperar iti naparpar a gurong ti tanod.

Kas maibasar iti police report, napaltogan ni Aslor bayat ti panagkalapna iti igid ti karayan a sakup ti Barangay Paing, Bantay, Ilocos Sur idi sardam ti Mayo 3.

Segun iti panagimbestiga dagiti polis, ik-ikkaten ni Aslor dagiti ikan a nakalapan ti iketna idi pinaltogan iti sumagmamano a daras ti saan a nabigbig a suspek a naabbongan ti rupana iti panio.

Nagsagrap ni Aslor iti sugat iti dua a sakana ket naitaray iti Gabriela Silang General Hospital.

Mapapati a naglibas ti di nabigbig a suspek kalpasan ti pammaltog.

Iti follow-up investigation nga inwayat dagiti polis, nakarekobreda iti dua nga empty shells manipud iti Gauge 12.

Naipanen dagiti kapsula iti police station para iti dokumentasionĀ  sakbay a maisubmiteda iti crime laboratory para iti ballistics/cross-matyching exasmination.#