Barangay tanod, pinaltogan ti polis

STA. CATALINA, Ilocos Sur – Maysa a barangay tanod ti mapapati a pinaltogan ti maysa a polis a nagramut iti panagririda iti maysa a natayan sadiay Barangay Cabaroan ditoy nga ili idi rabii ti Oktubre 30.

Nagsagrap ni Vincent Reonal y Rapisura, 38, naasawaan, barangay tanod, ken residente iti Barangay Cabaroan, ditoy nga ili iti sugat iti makannigid nga imana ket naitaray iti Metro Vigan Cooperative Hospital para iti pannakaagasna.

Naipan met iti police station ditoy nga ili ti suspek a nainaganan Police Officer 3 Edmar Viaje y Real, naasawaan, PNP member a nakadestino iti San Vicente Police Station.

Segun iti police blotter, sakbay ti pammaltog, nagsubang dagiti dua iti maysa a natayan iti nasao a barangay.

Kalpasan ti ririda, agtaktakder ti biktima iti kalsada idi sinakayan ni Viaje ti motorsiklona ket idi malabsanna ti biktima, mapapati a sinipatna daytoy iti babaen ti makannawan a lapayagna.

Kinamat ti Reonal ti polis sana ginammatan ti kuelio daytoy a nakatinnaganna ket naginnagawanda ti paltog ti suspek a maysa a cal. 9 mm pistol.

Mapapati nga aksidente a nakalbit ti suspek ti gatilio ti paltog a nakatiruan ti makannigid nga ima ti biktima.

Agtultuloy ti panagimbestiga dagiti polis mainaig iti nasao a pammaltog.#