Barangay ti Dagupan City paggapuan illegal a droga a mailako iti Ilocos: PDEA

DAGUPAN CITY – Aggapu iti Barangay Bonuan Binloc ditoy siudad dagiti illegal a droga a mailaklako iti parte ti Pangasinan, La Union ken Baguio City, inwaragawag ti Philippine Drug Enforcement Agency (PDEA) iti Ilocos Region itay nabiit.

Impalgak ni PDEA Ilocos Region Director Jeoffrey Tacio bayat ti maysa a programa iti telebision ditoy  a naggapu iti kumpirmasion  manipud kadagiti naar-aresto a drug pushers ken dealers kadagitoy a lugar.

Kinuna ni Tacio a gapu itoy, nakalista ti Bonuan Binloc a numero uno a kakaruan a barangay a naapektaran iti droga iti Pangasinan.

Immun-una ngem daytoy, binabalaw ni Secretary Antonio Villar, Jr., Dangerous Drugs Board Chairman, dagiti barangay officials iti nasao a barangay gapu iti awan naaramidanda para iti pannakaparukma ti problema ti droga iti lugarda.

Kinuna ni Tacio nga iti kaudian a listaanda, 102 a barangay iti Pangasinan ti apektado iti illegal a droga kakaruan kadakuada ti Barangay Bonuan Binloc.

Iti Barangay Bonuan Binloc, masuspetsa nga adda nasursurok ngem maysa a drug pusher ken adda maysa a nalimed a drug laboratory, bodega wenno den.

Nupay kasta, kinuna ni Tacio a kas maibatay iti panagmonitorda, awan pay ti laboratorio ti droga iti rehion, karaman ditoy ti Pangasinan.

Tallo pay a barangay iti Dagupan, ti Bonuan Boquig, Bonuan Gueset ken Lucao, ti nakalista nga adda iti Category 2 wenno moderately affected. No Category 2, masuspetsa nga adda maysa a drug pusher wenno trafficker.

Dinakamat pay ni Tacio a maysa a hot spot ti Barangay Camantiles iti Urdaneta City.

Indagadag ni Villar nga ituon ti PDEA ken ti polis ti imatangda kadagiti nadakamat a hot spots, nangruna iti Bonuan Binloc iti Dagupan City tapno maparmek ti problema ti droga iti Pangasinan.#