Natakuatan iti panagsukisok: panaginum iti baraniw juice, tsa, makalapped iti kanser

Baraniw juice? Wenno tsaa manipud iti baraniw? Apay a dimo padasen? Saanna laeng a lappedan nga umadu dagiti cancer cells no di pay dadaelenna dagitoy. Kasta ti natakuatan iti maysa a panagsukisok. Ti resulta, goodbye cancer!

Nagadu ti ruot a baraniw iti Ilokandia; ilalaok laeng no agpalkang iti bisukol wenno leddeg. No ikirog iti bugguong ti diguan wenno salamagian a paltat wenno burikaw, dayta baraniw ti pagpabanglo no awan ti masibbarut a naata a dippig. Iti met sabali a lugar, ilaokda iti tinola a pangikkat iti lang-es wenno ikabilda iti tian ti litsonenda a manok wenno baboy tapno bumanglo.

Gapu iti nadumaduma a sakit a cancer kas iti prostate cancer kadagiti lallaki, breast cancer kadagiti babbai, lung cancer kadagiti mannigarilio ken dadduma pay, immadu met dagiti agpa-radiation ken chemotherapy treatment. Ay, ket nangina met ngarud ti bayad iti tunggal session. Adda pay mamindua wenno mamitlo iti makalawas. Nagastos la ngaruden, saan met ngarud a makalasat amin nga agpaagas itoy.

Ngem pudno kadi a makalapped iti cancer ti baraniw?

Dayta ti natakuatan iti maysa a panagadal ti research team sadiay Israel nga indauluan ni Dr. Rivka Ofir, Prof. Yakov Weinstein, ken Albert Katz, chair in Cell-Differentiation and Malignant Diseases manipud iti Department of Microbiology and Immunology ti Ben Gurion University.

Ania ti natakuatanda?

Mapasamak kano ti apoptosis iti panaginum iti tsaa wenno juice manipud iti baraniw.

Ania, aya, dayta nga apoptosis?

Apoptosis (noun): a type of cell death in which the cell uses specialized cellular machinery to kill itself; a cell suicide mechanism that enables metazoans to control cell number and eliminate cells that threaten the animal’s survival.

Addaan kano iti naidumduma a ramen ti baraniw a pagtataudan ti kinabirtudna. Daydiay kano ayamuomna nga inawaganda iti citral ti rason no apay a mapasamak ti apoptosis.

Ania, aya, dayta a citral?

Citral is the key component that gives the lemony aroma and taste in several herbal plants such as lemon grass (Cymbopogon citratus), melissa (Melissa officinalis) ken verbena (Verbena officinalis.)

Lemon grass ti ingles ti baraniw. Awaganda met iti lemon balm dayta melissa officinalis, idinto a maysa a European herb dayta verbena. Dagitoy kano a ruruot ti addaan wenno pagtaudan iti citral a mangdadael kadagiti cancer cells. Tanglad ti pangawag dagiti Tagalog ti baraniw.

Adu dagiti napapateg a maited ti baraniw gapu nga immadun ti agmulmula itoy. Kaay-ayo ti baraniw ti yan ti nadam-eg a lugar ket nadaras a rumaber ken daddadakkel pay ti salapi dagiti pinuonda.

Kasano ngarud ti agaramid iti lemon juice?

Iti innem a salapi (stalks), kasapulanna met ti walo a tasa a danum ken innem a kutsara nga asukar. Dalusan dagiti salapi, ikkaten dagiti ramutna ken dagiti natangken nga ubbakna ken iwaen (breadth-wise). Lebbeken iti almiris wenno taltalen iti langdet  sa ipaburek. No bumerdeberden ti maris ti danum, pabassiten-alay-ayan ti apuy. Urayen ti sumagmamano a minutos. Sagaten. Laokan iti yelo ti inumen no kayat ti nalamiis. No pagtsaa, tay napudot.

Kadagiti addan marikriknana a bunga ti cancer, apay a diyo padasen? Nalatak daytoy nga inumen kadagiti sabsabali a nasion iti Asia ken Europe lalo kadagiti agessem iti herbal drinks.#