Barito, nalmes

VIGAN CITY – Awanen ti biag ti maysa a barito idi maalaw iti nagdigosanna a karayan sadiay Barangay Cabalangegan ditoy siudad idi malem ti Mayo 15.

Segun iti report, maysa a mensahe ti naawat ti police station ditoy idi agarup alas sais ti malem ti nadakamat a petsa a nangipakaammo nga adda lalaki a nagdigos iti Karayan Mestizo ngem dida nakita a limmung-aw.

Nabigbig babaen ti inuksotna a nalabaga a badona idi napan nagdigos  ni Joseph Tallesta, 15, ken residente iti Barangay San Jose ditoy met laeng siudad.

Nakikoordinar dagiti polis iti Maritime Command ken iti City Risk Reduction Management Council ket dagitoy ti nagbatok iti karayan.

Nabirokan ti biktima iti pasado alas dies ti rabii ket intarayda ti biktima iti Gabriela Silang General Hospital ngem naideklara nga awanen ti biag daytoy.

Segun iti ina ti biktima, adda kissiw ti anakna ket posible a nagkissiw daytoy bayat ti panagdigosna iti karayan.#