VIGAN CITY – Maysa a barito ti nasukalan a nagtakaw iti maysa a Law office iti Terminal Annex ditoy siudad idi malem ti Hunio 7.

Nabigbig ti suspek a ni Jonel Arellano y Raz, 15, baro, out of school youth, ken residente iti Barangay VIII, Vigan City.  Nasukalan iti ikutna ti maysa a wallet a naglaon iti P2,710, $3, ken maysa a Singaporean dollar a kuarta ni Alleli Gaye Hernaez y Panem, 38, naasawaan, sekretaria lti Panem Law Office.

Iti inisial a panagimbestiga dagiti polis, napan nangaldaw da Hernaez iti panganan nga asideg iti opisinada ngem impakaammo ni Cecilio Pacis, addaan iti opisina iti asidegda, nga adda nakitana a lalaki a simrek iti opisinada.

Dinagdagus da Hernaez ti napan iti opisinada ket nakitada ti suspek a rummuaren iti main door.

Sinukimat da Hernaez ti suspek ket narekobreda iti ikut daytoy ti wallet ni Hernaez a naglaon kadagiti nadakamat a kuarta.

Naipaima ti suspek iti Vigan City police station para iti umisu a disposision.#