Barito natiliw iti CCTV nga agtaktakaw iti aruaten a pambabai

BANAYOYO, Ilocos Sur — Gapu ta kanayon a matakawan iti nakabalaybay a bado ken Avon underwear ni Julie Ann Rafanan y Tejero, 32, addaan asawa, self-employed, ken residente iti Sitio Natan-ok, daytoy nga ili, nagpaikabil isuna iti CCTV iti balayda.

Idi napukawan manen iti aruaten iti bigat iti Marso 8, daytoy a tawen, sinukimat ni Rafanan ti CCTV footage ket ditoy a naduktalanna a ni John Albert Torricer y Gambala, 19, aluminum door/window installer ken residente ti Sitio Carcarot, Brgy. Salvador Primero, Siudad iti Candon ti agtaktakaw kadagiti bado ken underwearna.

Tapno manayonan ti ebidensia, nangibalaybay ngarud ni Rafanan iti aruaten idi Marso 9, ket natiliw manen ti CCTV ni Torricer nga agtaktakaw iti tallo nga underwear idi 2:38 ti agsapa ti Marso 10. Naduktalanna pay a nakakawes iti bestida ti suspek bayat iti panagtakawna.

Iti panangbuyada iti record ti CCTV kadagiti naglabas nga rabii, naamuan nga uray idi Marso 2 ket adda pay tinakaw ni Torricer a nadumaduma nga aruaten.

Agarup Php20,000 ti gatad ti amin a tinakaw ni Torricer. Addan iti ikot ti Banayoyo MPS ti suspek. (Tawid News Team)