Barko, napasikig iti kabaybayan ti Candon City, maysa ti natay

CANDON CITY – Maysa a tripolante ti natay idinto a naisalakan dagiti duapulo pay a naglugan iti maysa a Singaporean vessel a napasikig ken naisadsad iti kabaybayan a sakup ti Barangay Patpatta Primero idi malem ti Hulio 17.

Iti pannakaisurat daytoy ket saan pay nga ammo ti nagan ti natay a tripolante a mapapati nga inatake ti puso.

Kinuna ni Provincial Disaster and Risk Reduction Management Council Officer Michael Chan nga addaan iti duapulo a pahinante a Filipino.

Segun iti report, am-ammuen pay ti Philippine Coast Guard no ania ti nakagapu ti pannakapasikig ken pannakaisadsad ti barko. Ngem mapapati a nadadaelan ti makina ti barko a nagmarka iti MBC gapu iti kinadawel ti baybay ti nakaigapuan ti pannakapasikigna.

Kinuna ni Chan a maysa a tugboat ti immarayat kadagiti pahinante ket daytoy ti naglugananda a nagturong iti Salomague Port a pakaidissaaganda sada maitaray iti kaasitgan nga ospital para iti pannakatamingda.

Innayon ni Chan a nupay agarup 300 metro laeng ti kaadayo ti barko iti takdang, awan ti makaasideg iti barko gapu iti kinadakkel dagiti dalluyon.

Kabayatanna, problema dagiti agindeg iti Barangay Dardarat, Cabugao ti saan pay a pannakaikkat ti barko a naibalandra iti kabaybayan a sakup daytoy a barangay.

Mapapati a sumagmamano a corral reefs ken fish cages iti nadakamat a barangay ti nasari ti nasao a barko idi dimmuprak ni Bagyo Egay.

Saan pay nga ammo no mano ti balor dagiti nadadael a tangrib ken fish cages.

Idi pay la napan a tawen a naisadsad ti nasao a barko iti kabaybayan ti Barangay Dardarat.

Mapattapatta a problema ti akinkukua ti dakkel a magastona ti pannakaakkal ti nasao a barko iti nakaisadsadanna.

Kabayatanna, nupay pimmanawen ni Bagyo Egay iti Philippine area of responsibility idi Hulio 7, nagtultuloy ti napigsa a bayakabak iti Amianan a pakairamanan ti Ilocos Sur gapu iti panangguyod ti limmabas a bagyo iti habagat a nakaigapuan ti panaglayus ken pannakakurukor dagiti kalsada iti sumagmamano a lugar iti probinsia.

Nataktak ti biahe dagiti lugan idi agsapa ti Hulio 17 gapu ta saanda a makalasat iti Pideg, Santa gapuen ti pannakakurukor ti kalsada maigapu iti dakkel a bagi ti danum ken kadagiti dadakkel a bato nga indaknir ti dakkel a danum a naggapu iti bantay.

Nagna met laeng ti trapiko kalpasan ti sumagmamano nga oras apaman a naiwalin dagiti bangen ngem maysa laeng a linia ti naluktan isu a nagsinnublat dagiti lugan nga agpaamianan ken agpaabagatan a lumasat. (Karaman ti report ni Danny Antalan)