Footer

Baro a dadakkel a proyekto iti irigasion, maisayangkat iti Ilocos Sur

VIGAN CITY – TAPNO mapadur-as ti benneg ti agrikultura kangrunaanna iti panagtalon ken mapaadu ti maapit a taraon, maisayangkat dagiti dadakkel a proyekto ti irigasion iti dua a distrito ti Ilocos Sur.

Dayta ti nairakurak kabayatan ti insayangkat ti National Irrigation Administration nga “Stakeholders’ Forum on Irrigation Development” sadiay Plaza Maestro Convention Center, Vigan City idi Oktobre 24, 2018.

Indauluan ni NIA Administrator retired General Ricardo Visayas ti forum, ken dinar-ayan da NIA Region 1 Director Vicente Mudo, dagiti opisial ti nagduduma nga ahensia ken dagiti pannakabagi dagiti kongresista ti Provincial Government ti Ilocos Sur ken La Union. Nakikaysa pay iti forum da Vigan City Mayor Juan Carlos Medina, 1st District Rep, Deogracias Victor Savellano, ken Board Member Efren Rafanan a nangirepresentar ken ni Gov. Ryan Singson.

Dimmar-ay met dagiti mannalon nga opisial ken kameng dagiti gunglo ti irrigators iti Ilocos Sur ken La Union, ken dagiti agpapaay iti nagduduma nga ahensia kas ti Department of Agriculture, Department of Public Works and Highways ken dadduma pay nga opisina ti gobierno ken pribado a sektor pakairamanan ti media. Nakikaysa pay da Brig. Gen. Henry Robinson, Commander ti Philippine Army 702nd Brigade, ken Lt. Col. Charles Castillo, Commanding Officer ti 81st Infantry Battallion, a nangilawlawag ti Internal Security and Peace and Order Situation ti Ilocos Sur,

Inlawlawag dagiti opisial ti NIA iti Ilocos Sur dagiti proyektoda iti Umuna a Distrito. Nairakurak ti pakabuklan ti plano a pannakabangon ti Ilocos Sur Transbasin Project a kasukat ti Gregorio Del Pilar Irrigation Project a saan a natuloy gapu ti panangkontra dagiti umili ken lokal a gobierno dagiti maseknan a local government units. Nailawlawag a ti plano ket aggapu ti danum manipud iti Abra River ken mapasayakan dagiti rinibu nga ektaria iti kataltalonan iti ili ti Quirino, Del Pilar, Salcedo, Galimuyod, Candon, Santa Lucia, Santa Cruz, Candon City, Santa Maria, Burgos, Narvacan ken Nagbukel. Naipakaammo pay a karaman ti plano ti pannakapataud ti mini hydro power plant nga agpataud iti elektrisidad, ken mang-supply iti danum kadagiti water district nga agturong kadagiti pagtaengan.

Naipakaammo pay ti proyekto a Barbar Small Reservoir Irrigation Project sadiay San Juan, Ilocos Sur, ken ti Gako Small Reservoir Irrigation Project iti Cabugao, Ilocos Sur a no malpas ken pasayakanna dagiti adu a barangay iti dua nga agabay nga ili.

Iti panagsarita ni NIA Administrator Visaya, impaganetgetna ti kinapateg ti irigasion tapno mapadur-as ti agrikultura. Impakaammona a mayanatup iti flagship project ti NIA para ti Build, Build, Build Program ti administrasion ni Presidente Rodrigo Duterte ket plano ti ahensia ti mangisayangkat kadagiti dadakkel nga irrigation projects iti sapasap a Pilipinas, ken maikkan iti prioridad dagiti probinsia a dakkel a porsiento dagiti kataltalonanna ket awanan pay iti irigasion pakairamanan ti Ilocos Sur.

Inlawlawagna a maisaysayangkat dagiti stakeholders forum kadagiti nagduduma a paset ti Pilipinas tapno maipakaammoda ti nagapuanan, ar-aramiden, ken plano ti NIA, ken kayatda nga ammuen ti karirikna ken kapanunotan dagiti umili mainaig kadagiti proyekto nga isayangkatda.

“I don’t want to implement projects without enough consultations so that time, fund and efforts will not be wasted in vain,” kinuna ni Visaya iti panangipalagipna iti pannakaitantan ti Gregorio Del Pilar Irrigation Project.

Inlawlawagna a kayat ti NIA ti mangbangon kadagiti dadakkel nga irrigation projects iti Ilocos Sur ken La Union tapno ngumato pay ti Region I a maikatlo a top rice producing region iti Pilipinas, sarunuenna ti Region 2 a maikadua, iti umuna a Region 3.

Inlawlawagna a 48% pay laeng dagiti kataltalonan iti Ilocos Sur, ket kayat ti NIA a maipangato agingga iti 60% babaen ti pannakaileppas dagiti irrigation projects.

“Itutuloy natin ang proyektong Ilocos Sur Transbasin dahil wala ng lulubog na barangay, kagaya nga Gregorio Del Pilar Projects na may 80 bahay at isang barangay na lulubog” kinuna ni Visaya iti panangilawlawagna a mabalin a dumanon iti P100 Billion ti mausar a pondo iti Ilocos Sur a marugian iti arintapusen ti 2019 wenno rugi ti 2020.

Iti panagsarita da Cong. Savellano, Ex Cervantes Mayor Benjamin Maggay a nangibagi ken ni Cong. Eric Singson, Board Rafanan ken dagiti pannakabagi ti gobernador ken dua a kongresista iti La Union, pinagyamananda ti NIA kadagiti isaysayangkatda a proyekto a mangpadur-as ti agrikultura iti Region 1. Impasingkedda ti agtultuloy a panagsuportada kadagiti proyekto ti NIA ken tulongda kadagiti mannalon tapno dumur-as ti industria ti panagtalon, ken umadu dagiti apit ken mapataud a taraon para iti pagilian. (Eden Alviar)

, , ,