Baro a drug personality, napapatay iti buy-bust operation

CAMP BGEN OSCAR M FLORENDO – Nagudas ti biag ti maysa agnagan Ruben C. Bautista, 38, agnaed iti Brgy. Pug-os, Cabugao, Ilocos Sur, ken segun kadagiti polis ket maysa a baro a drug personality kalpasan a nakipinnaltog isuna kadagiti kameng ti San Fernando City Police ken Philippine Drug Enforcement Agency-Regional Office 1.

Segun kenni Police Chief Superintendent Romulo E. Sapitula, Regional Director, PRO1, nangisayangkat iti buy-bust operation dagiti anti-illegal drugs operatives idi 1:38 a.m. ti Enero 8 daytoy a tawen iti Barangay Pias, San Fernando City, La Union, tapno matiliw ti maysa a naduktalan a baro a drug personality iti siudad.

Iti polis report, nakadlaw kano ni Bautista a polis ti katransaksionna, ket ditan a nanguksot iti paltog sana pinaputukan dagiti police operatives a bimmales met iti paltog.

Naitaray ti napaltogan a suspek iti San Fernando City Health Office ngem natayen a dimmanon.

Narekobre ti SOCO ti 6 sachets ti shabu, 5 sachets ti marijuana, 1 Smith and Wesson caliber 9mm pistol, ID, Nokia cellphone ket maysa ribu a marked money manipud iti nakapasamakan ti insidente. (Tawid News Team, manipud iti report ti PNP PRO1 PIO)